Hamac, Pilapil nisidlak sa tagsa-tagsa ka duwa

Sila si Ronald Hamac ug Alan Pilapil maoy nidaog sa championship trophies sa tagsa-tagsa nila ka chess tournament nga ilang giapilan niadtong Sabado diha sa Gaisano Bowlingplex.

Si Hamac maoy nidaog sa United Architects of the Philippines (UAP) chess tilt sa iyang 4.0 points.

Si Jeffrey Solis nitapos sa ikaduha uban ang 3.0 puntos, gisundan kini ni Glenn Dakay sa iyang 2.0 puntos.

Sa iyang bahin, si Pilapil mao sab ang nidominar sa Philippine Society of Medical Engineers chess event.

Si Pilapil niposte og 2.5 puntos, nga tunga lang ka punto ang ligas sa nagsunod niining si Charlie Relos, kinsa nipahiluna sa ikaduhang dapit. Gisundan kini ni Nathaniel Barata alang sa ikatulo nga dapit ug ni Benjie Sanchez alang sa ikaupat nga dapit.

Sa laing bahin, ang Cebu Executives and Professionals Chess Association (CEPCA) mopahigayon sa ilang monthly handicapping tournament karong Domingo sa ala-1:00 sa hapon diha sa Stella Maris sa Pier 4 sa North reclamation area.

Bukas kini sa tanang CEPCA members ug guests ug ang maong kompetisyon gibahin sa tulo ka category, Class A, B ug C.