Eksplosibong gubat mahitabo sa Mandaue

Si World Boxing Council (WBC) No. 9 lightweight contender Randy 'Kumong Bato' Suico mipasalig nga usa ka eksplosibong away ang mahitabo sa iyang pakigsangka batok ni Thai Pongpetch Chuwatana sud sa 12 ka hugna alang sa bakanteng Oriental and Pacific Boxing Federation (OPBF) lightweight title.

Ang kumbati nilang Suico ug Chuwatana maoy main event sa double championship boxing promosyon sa Rex 'Wakee' Salud International inabagan sa MP Promotions ni boxing superstar Manny Pacquiao ugma sa gabii diha sa Mandaue City Sports and Cultural Complex.

Sa supporting main event, si Jerope Mercado sa Cagayan de Oro City mohagit ni defending champion Eden Sonsona sa Manila alang sa Philippine super flyweight title sa kulbahinam nga bugno sa duha ka way pildeng boksidor.

"Seguradong gubat gyud ni ang mahitabo. Dili ko kasulti kanus-a nako siya tumbahon pero akong tan-aw dili ni mahuman og 12 rounds among away," matud pa ni Suico atol sa SCOOP-Cebu forum kagahapon diha sa Baseline Restaurant.

Si Juanito 'Jun' Ablaca, ang trainer ni Suico mipahimangno sa iyang batos nga dili mokompiyansa gumikan kay kusog sab og kumo si Chuwatana.

"Gi-ingnan ko sa akong higala sa Thailand nga si Narung Hengtrakul nga magmatngon kuno si Suico sa right overhand ni Chuwatana kay kusog kaayo. Mao ni hinungdan nga ang katapusan niyang upat ka daog pulos pinaagi sa knockout," matud pa ni Ablaca.

"Apan amo nang gipraktisan og maayo unsaon pag-counter niini. Andam na kaayo si Randy nga mo-away ug hinaut nga maayo ang ikapakita niyang abilidad sa mga Cebuano," dugang pa ni Ablaca.

Gawas nga mohimo og impresyon sa iyang tagilungsod, naglaraw sab si Suico nga manindot ang iyang pagbalik human mapakyas sa iyang tinguha pagsakmit sa WBA lightweight title human gipilde sa Meksikanong si Juan 'Baby Bull' Diaz pinaagi sa TKO sa ikasiyam nga hugna niadtong Hulyo 15 didto sa Las Vegas.

Si Suico nagbitbit og 24-3 win-loss record uban ang 21KOs, samtang si Chuwatana nagtangag og 9-14 nga baraha uban ang 7KOs.

Angayan sab nga lantawon ang engkuwentro tali nilang Sonsona (9-0, 1KOs) ug Mercado (10-0-1, 4KOs) nga pulos wala pa makatilaw og pilde.

Sa eksplosibong undercards, ang mga pag-umangkon ni Randy Suico - ang managsuong Apol (8-0, 5KOs) ug Benedict Suico (12-2, 9KOs) mopakita sab sa ilang abilidad.

Si Apol makighamag batok ni Jun Pader sa Bernard Yu Stable sa Butuan City, samtang si Benedict makigtige ni Edwin Ubatay.

Lain pang mopakita'g aksiyon mao sila si Gedion Amba batok Darell Pucdol, Rolly Mandahinog batok Boggie Delada ug Ronnie Peñonal batok Mario de Asis.

Ang mga tiket nagkantidad og P150 sa general admission, P300 sa ringside, ug P500 sa sponsors.