Don Bosco Greywolves nakatilaw na gyud og daog

Nakatilaw na gyud og daog ang Don Bosco Greywolves sa ilang duwa batok sa University of San Carlos (USC) Baby Warriors sa iskor nga 64-52 sa Cebu Schools Athletic Foundation, Inc. (CESAFI) basketball event kagahapon diha sa Cebu Coliseum.

Sa pikas bahin, ang University of Cebu (UC) Lady Webmasters padayong nanghawod human gipilde ang karibal niining USC Lady Warriors, 82-79.

Ang Greywolves wala gyud magpadala sa presyur sa duwa bisan pa man og nakahimo pa ang Baby Warriors pagsikit sa duwa, 50-55 sa katapusang kuwarter.

Sa ikatulong kuwarter, ang nawagtangan og sentro ang Greywolves tungod sa pagtagak ni Vincent Victor Villamor kinsa nga padulong unta mo- layup sa nahabiling tres segundos sa maong kuwarter diin naglabaw sila sa iskor nga 46-37.

Si Villamor gituohang dili makaduwa sud sa usa ka tuig tungod sa injury nga gitawag og "tibi fibula."

Mao pa kini ang unang daog sa Greywolves sud sa tulo ka duwa, samtang ang Baby Warriors nagbibit og 1-3 win-loss record.

Si Marvin Malicden maoy responsable sa kadaugan sa iyang 17 puntos, samtang si Christo Ray Lapitan niamot og 14 puntos ug si Villamor nipuno og 11.

Matawag nga demalas ang maong adlaw alang sa Don Bosco tungod kay gawas ni Villamor, si Mark Rodriguez nakasinati sab og minor sprain ankle injury.

Sa laing bahin, si Alana Lim kinsa nipakita sa iyang kabangis sa low post maoy nangulo sa UC Lady Webmasters uban ang 25 puntos.

Ang unang babaye nga nahimong CESAFI MVP nga si Clarissa Lanuza nitapos og 20 puntos samtang si Maricel Fernandez niamot og 15.