Tagbilaran City mopasidungog sa 'boxing heroes'

Ang kagamhanan sa siyudad sa Tagbilaran ubos sa pamunoan ni Mayor Dan Neri Lim mipasidungog sa iyang mga boxing heroes sa professional ug amateur ranks sa usa ka yano nga seremonyas kagahapon atol sa unang adlaw sa usa ka bulan nga kasaulogan sa 40th Charter Day sa maong dakbayan.

Si Mayor Lim mao mismo ang nangunay'g hatag sa plaques of appreciation ug cash incentives sa mga inilang Bol-anong boksidor.

Lakip sa gipasidunggan mao sila si ALA ring stars Rey 'Boom Boom' Bautista ug Czar Amonsot.

Si Bautista ang sumosunod ni Manny Pacquiao, mao ang naghari sa WBO Asia Pacific bantamweight.

Ang fighter nga taga-Candijay, Bohol nagkupot og limpiyong rekord nga 20-0 uban ang 15KOs. Si Bautista gikatakdang moaway karong Septiyembre 16 batok sa wala pa mahibaw-i nga kaparang didto sa MGM Grand sa Las Vegas, Nevada.

Sa iyang bahin, si Amonsot mao usab ang bag-ong kampiyon sa WBO Asia Pacific superfeatherweight. Iyang gipasigarbo pag-usab ang mga Bol-anon sa dihang iyang gikastigo ang Meksikano nga si Silverio Ortiz niadtong Domingo didto sa Araneta Coliseum.

Sa laing bahin, ang Tagbilaran City Boxing Team, nagpakita sa ilang kahanas sa natad sa boksing pinaagi sa ilang pagdaog sa kampiyonato sa 21st Visayas Inter-City Developmental Age-Group Amateur Boxing Championship duha ka semana ang milabay didto sa dakbayan sa Maasin ug mitapos nga 2nd runner-up sa overall sa 2006 National Youth and Women's Amateur Boxing Olympic Festival niadtong Hunyo 20-26 didto sa Mindanao Civic Center sa Tubod, Lanao del Norte.

Hapit maharos og hakot sa mga protagonista sa Tagbilaran ang bulawan dihang ilang nadaog ang lima sa unom ka bulawan sa Maasin event pinaagi sa paningkamot nilang Jenno Cabugngan (34 kgs.), Jefferson Reodique (36 kgs.), Welbeth Loberanis (42 kgs.) Noel Adelmita (40 kgs.) ug Melvin Basengga (32 kgs.).

Midaog sab sila og silver kortesiya ni Joshua Odtohan (38 kgs.) ug bronze gikan ni Jomar Cordello (45 kgs.).

Sa Tubod, gilabni ni Alde de Zosa ang bugtong bulawan pinaagi sa pagpanghawod sa 64 kgs. division. Si Wengweng Haya mitunol og silver sa 57 kgs., samtang sila si Marjo Borres (48 kgs.) ug Marjohn Yap (51 kgs.) mitiltil og bronze matag usa.