Big Al's gibalik

Subling gibalik kagahapon ang Big Al's pedal pushing event human kini nahilom duha ka tuig na ang nakalabay.

Ning bag-o, ang Big Al's dili lamang sa mountainbike kondili lakip na sab sa bmx ug skateboarding nga himuon karong Mayo 26-28 diha sa bakanteng luna sa Cebu Grand Hotel sa Camputhaw.

Si Architect Alan Choachuy, kinsa mao usab ang acting race director, mitukod sa Big Al's event isip kabahin sa iyang kontribusyon sa pagpalambo sa cyling ug skateboarding dinhi sa Cebu.

Ang bmx ug skateboarding gibahin sa tulo ka dibisyon, ang open, juniors ug novice class.

Sa mountainbike competition gibahin sab kini ngadto sa walo ka dibisyon ug kini mao ang seniors, juniors, veterans, masters, golden boys, beginners, fat boys ug ang executive level.

Ganting salapi ug tropeyo ang maangkon sa mga mananaog sa maong kompetisyon.

Ang registration fee sa mountainbike nagkantidad og P250 labot na ang event jersey, certificate of finish ug gift pack, samtang ang entry fee sa duha ka disiplina ipahibalo unya uban na niini ang mga premyo.

Ang nag-unang 100 registrants mao lamang ang hatagan og jersey ug personalized number bib ning maong torneyo nga gipaluyohan sa Cebu Grand Hotel, Rocky Mountain Sports, Classical Touch, Dew Foam, Dura Brand, YKK Trading, GAP/Mobile ug Toes.