Gimasaker ang bisitang team

Walay bisan gamay'ng kaluoy nga gipahungaw ang MLSDF-Mantawi Traders sa bisitang West Negros College Mustangs tungod kay ila kining gimasaker ngadto sa pagposte og 82-55 nga kadaugan sa ML Kwarta Padala Mindanao Visayas Basketball Association (MVBA) First Conference niadtong Biyernes diha sa Mandaue City Sports and Cultural Complex.

Si Doroteo Almacin miratsada og 18 puntos, samtang si Randy Sevilla miamot og 16 puntos alang sa Traders nga nagbitbit na karon og balanseng baraha nga 2-2 ning torneyo nga gipaluyohan sa ML Kwarta Padala, Cokaliong Shipping Lines, Nature's Spring Drinking Water, Panasonic, Molten ug Sulpicio Lines.

Daw sama sa mantikang nato'g ang opensa sa Mustangs gumikan kay dos puntos lang ang ilang nahimo kortesiya ni Ely Olarte sa nag-unang 15 minutos sa duwa. Niadtong tungora, si Almacin mipabuto og 11 puntos aron pagtuboy sa Traders ni mayor Thadeo Ouano ug coach Eddie Ybañez ngadto sa makalisang nga labaw, 33-2.

Ang Mustangs mitubag pinaagi sa paglusad og 18-2 run aron pagpahiyos sa labaw ngadto sa 15 puntos, 20-35, apan mao ra kadto ang labing nindot nilang nahimo gumikan kay miarangkada man og balik ang Mantawi aron pag-angkon sa 31 puntos nga labaw sa katapusang dos minutos sa duwa, 78-47.

Si Olarte mikulit og MVBA record sa labing dakung puntos sa usa ka duwa sa pagkulit niini og 33 puntos, apan wala kini makaangkon og igong suporta sa iyang kaubanan.

Ubay-ubay pang mga record sa liga ang nakulit sa maong duwa. Ang dos puntos nga nahimo sa Mustangs sa unang kuwarter maoy labing gamay nga iskor sa usa ka kuwarter ug ang 55 puntos nilang iskor maoy labing gamay sa usa ka duwa.

Mao sab kadto ang kinadak-ang daog sa liga gumikan kay gilubong man sa Mantawi ang Mustangs og 27 puntos aron pagpapas sa 18 puntos nga daog nga giposte sa Cebu Landmaster-Toledo batok sa Toyota-Iloilo Warriors, 83-65.

Tak-opon sa West Negros ang tulo ka adlaw nilang pagbisita sa Sugbu karong adlawa diin ilang sangkaon ang Landmaster ni realtor Joe Soberano ug coach Jun Tan sa alas 5:30 sa hapon didto sa Marcelo A. Barba Sports Complex sa dakbayan sa Toledo. The scores

Mantawi - (82) Almacin 18, Sevilla 16, Berame 9, Guangco 8, Akad 7, Garcia 6, Calo 6, Ducay 4, Lozano 3, Arellano 3, Pepito 2

West Negros (55) - Olarte 33, Vergara 6, Tizon 4, Suante 3, Baydo 3, Espiritu 2, Dapar 2, Padilla 2

Quarterscores: 21-2, 38-20, 61-40, 82-55