Larong bida sa Mantawi

Ang Hapee/Dewfoam-backed Mantawi Sparkling Knights mipaulan og usa ka dosenang 3-point shots aron pagpukan sa bisitang Iligan Crusaders, 88-75, alang sa ikaduha nilang sunod-sunod nga kadaugan sa 2005 Panasonic-NBC National Championship sa miaging gabii didto sa Mandaue City Cultural and Sports Complex.

Nagmangtas og maayo si Ardy Larong aron pagpangu niini sa Mantawi Sparkling Knights bitbit ang 24 puntos uban ang walo ka rebounds, lima ka assists, tulo ka steals ug duha ka blocks.

Ang beteranong pointguard nga si Maui Huelar mitampo og 13 puntos, uban ang season-high walo ka assists, duha ka rebounds ug duha ka steals aron pagtunol sa Iligan Crusaders sa ikaupat niining pilde sa pito ka duwa.

Eksplosibo kaayo ang gipabuhagay nga duwa sa Mantawi Sparkling Knights gumikan kay miposte kini og 21 puntos nga labaw sa nanghinapos nga bahin sa first half, 46-25.

Apan ang Crusaders wala mawad-i og paglaum, gani mi-rally kini aron pagkitkit sa labaw sa iskor nga 71-77 sa nahabilin nga 2:45 sa duwa.

Mao kadto ang labing maayong nahimo sa Crusaders gumikan kay ang Mantawi Sparkling Knights mipakita man sa ilang katakos sa daginutong oras.

Misamot pa ang kalbaryo sa Crusaders human ma-eject ang ilang coach nga si Billy Reyes gumikan sa pagpunay niini og reklamo sa tawag sa mga reperi.

Si Huelar milansang og duha ka free throws aron pag-abli sa pultahan sa Mantawi Sparkling Knights ngadto sa kadaugan.

Puntos matag usa MANTAWI (88)



Larong 24, Huelar 13, Gloria 11, Moreño 10, Tundag 7, Capati 6, Carretas 6, France 5, Ignacio 4, Antiporda 2.

ILIGAN (75)

Roque 17, Kong 14, Fajardo 12, Ayodelle 10, Sagad 8, De Guzman 5, Baguio 4, Cosingan 3, Faustino 2.