Bentaheng 2-0 asam ng magkapatid

Magaan na naipanalo ng San Miguel at Coca-Cola ang Game-One ngunit tiyak na matinding hamon ang kanilang haharapin sa pagpapa-tuloy ng semifinal series ngayon.

Gaganapin ngayon ang Game-Two ng magkahiwalay na semifinal series ng PBA Samsung Reinforced Conference sa PhilSports Arena.

Unang isasalang ang Beermen na muling haharap sa Sta. Lucia sa alas-5:00 ng hapon habang isusunod naman ang pakikipaglaban ng Tigers kontra sa Talk N Text sa alas-7:30 ng gabi.

Kapwa taglay ng magkapatid na kumpanyang SMBeer at Coke ang 1-0 kalamangan sa best-of-five semifinal series matapos ang 109-88 at 88-73 panalo kontra sa Realtors at Phone Pals ayon sa pagkakasunod sa pagbubukas ng serye noong Linggo. (Ulat ni CVOchoa)