Asi, Player of the Week uli

Sa ikalawang sunod na pagkakataon, muling napiling Player of the Week ang 6’9 center ng Talk N Text na si Asi Taulava.

Bagamat ang 16 puntos na naitala nito kontra sa Purefoods ay bahagyang natakpan ng winning basket ni import Damien Cantrell kasabay ng pagtunog ng buzzer, walang duda pa rin si Taulava ang nagdala sa laro at mapiling player of the week para sa linggo ng Setyembre 15-21 at daigin ang kakamping si Jimmy Alapag.

Tinalo ni Taulava ang kakampi dahil sa magandang nilaro nito kontra sa Shell noong Linggo.

Bagamat hindi nakalaro si Shell import Sedric Webber dahil sa fractured ankle, inakala ng lahat na matatabunan ito ng per-formance ni Cantrell.

Ngunit sinorpresa ng Shell ang Phone Pals at binigyan ng defensive pressure si Cantrell at makalapit sa 51-52 sa halftime.

At dito, ginamit ni interim head coach Virgil Villavicencio ang lakas at taas ni Taulava kung saan naging epektibo naman.

Binugbog ni Taulava ang Shell nang 10 sunod na puntos na hindi na nakayanang habulin ng Shell.

At sa tulong pa ni Alapag, lalong nabaon ang Turbochargers. Si Alapag ay umiskor ng kabuuang 15 puntos ng gabing iyon.