Pinoy boxers sali sa Thailand at Europe slugfest

Dalawang koponan ng Filipino boxers ang umalis kagabi (Miyerkules) para sumabak sa mahigpitang international competitions sa Thailand at Europe bilang bahagi ng kani-kanilang buildup para sa Busan Asian Games sa Setyembre.

Pangungunahan nina Harry Tanamor at Violito Payla, gold medal winners sa nakaraang Prof. Chowdry Cup sa Baku, Azerbaijan ang Team Philippines na magpapakita ng aksiyon sa Gee Bee slugfest sa Helsinki, Finland at sa Socikas championship sa Kaunas, Lithuania.

Ang nasabing dalawang European tournaments ay sabay-sabay na gaganapin. Magsisimula ngayong araw ang Finland event, habang ang Lithuania slugfest at sisimulan sa Abril 10.

Ang isa pang koponan ng bansa na binubuo ng mga bata ngunit very promising boxers ang eentra naman sa 25th King’s Cup tournament sa Bangkok simula ngayon at magwawakas sa Abril 10.

Magpapakita ng aksiyon si Tanamor sa light flyweight class, habang si Payla ay lalahok sa flyweight division. Ang kani-kanilang teammates ay sina Vincent Palicte (bantam), Roel Laguna (feather), Anthony Igusquiza (light-flyweight) at Olympian Romeo Brin (light welter).

Ang mga kasali naman sa King’s Cup ay sina Godfrey Castro (lightfly), Warlito Parrenas (flyweight), Ferdia Gamo (bantam), Jogen Ladonb (feather), Florencio Ferrer (lightweight), Maximino Tabangcora III (welter) at Maraon Goles (light middle).