Kaya nating manalo ng ginto sa Asian Games

Marami ang nagsasabing imposible ang pinupuntiryang gintong medalya ng Philippines at nangunguna na rito ang pangulo ng Asian Basketball Confederation (ABC) na si Carl Menky Ching.

Ngunit hindi ito dahilan para kabahan ang Philippine Basketball Association na nangangasiwa sa pagbuo ng Pambansang koponan na ipapadala sa Asian Games na gaganapin sa Busan, South Korea sa September.

Bagkus ay lalo pa ngang na-challenge si PBA Commissioner Jun Bernardino sa lumabas na pahayag ni Menky na ‘suwerte na ang RP team na maka-6th place."

"I will take that as a challenge," pahayag ni Bernardino sa contract signing ng PBA at Lamoiyan Corporation para sa pag-i-sponsor ng Hapee Toothpaste sa isa sa dalawang Candidates team sa Westin Philippine Plaza kahapon.

Sinegundahan din ito ni Cecilio Pedro, presidente at CEO ng Lamoiyan. "I don’t believe we can’t do the task. That is why we feel that this (ang pagsuporta sa RP team) is what we ough to do as Filipino. I believe we can win the gold."

Tulad ng Selecta, ang susuporta sa isa pang koponan ng Candidates pool, ang Lamoiyan ay gagastos ng P15 milyon sa sponsorship.

Samantala, ukol naman sa kaso ni Rommel Adducul, sinabi ni Bernardino na nakikipag-ugnayan na ang PBA sa Metropolitan Basketball Association kung paano ito makakalaro sa National pool na sasabak sa Governors Cup na magbubukas sa Pebrero 10.

"It will take some time to get into a compromise," ani Bernardino. "We’re working on what will it take for Adducul to play in the PBA.

Kabilang sa koponang susuportahan ng Hapee ay sina Danny Ildefonso, Johnny Abarrientos, magkapatid na Danny at Andy Seigle, Boyet Fernandez, Noy Castillo, Renren Ritualo, Jeffrey Cariaso, Rudy Hatfield, Don Camaso, Mick Pennisi, Davonn Harp, Marlou Aquino, Adducul at E.J. Feihl.