PBL Challenge Cup: Welcoat kontra Blu

Magsasagupa ngayon ang Welcoat Paints at Blu Detergent para sa krusiyal na panalo na magkakaloob sa kanila ng tsansa sa semifinal berth sa 2001 PBL Challenge Cup sa Makati Coliseum.

Ang Paint Masters at ang Detergent Kings ay parehong nagtataglay ng 7-5 win-loss slate at ang mananalo sa alas-5:30 ng hapong sagupaan ay magkakaroon ng pag-asa sa awtomatikong semifinal slot.

Ang mananalo ay kinakailangan makalusot sa kanilang huling laban at umasang matatalo ang defending champion Shark Energy Drink sa isa sa kanilang huling dalawang laro gayundin ang ITCSI-La Salle upang makapuwersa ng three-way-tie sa unahan.

Sa ganitong kaso, ang koponan na may pinakamataas na quotient ang makakakuha ng No. 1 spot habang ang huling dalawang koponan ay maghaharap sa play-off para sa huling awtomatikong semis berth.