'Bata' kampeon sa Japan tutungo naman sa Poland

Umalis ng Japan si Efren ‘Bata’ Reyes patungong Poland bitbit ang isang malaking tagumpay makaraang makopo ang Tokyo 9-Ball championships, ang pinakamayaman at pinakamalaking international billiard tournament na itinanghal.

Lalaro si Reyes sa $50,000 World Pool League sa Warsaw sa Nobyembre 16-18 na katatampukan ng walong inimbitahang pool pros ka kinabibilangan ni nagdedepensang kampeon na si Mika Immonen ng Finland, 5-time world champion Earl Strickland ng US at ang kababayang si Francisco ‘Django’ Bustamante.

Magaan na dinaig ng 47 anyos na tinaguriang "The Magician" si Niels Feijen, 15-7 sa finals ng Tokyo Meet upang muling madagdagan ang kanyang makulay na career at magbaon din ng 20 million yen (US$ 160,000).

Ito ang ikalawang major title ni Reyes ngayong taon. Una ay nang talunin niya si Strickland, 13-9 sa finals ng First US Masters Championship sa Chesapcake, Virginia. Nagwagi din siya sa Accu-Stats 8-Ball Invitational sa Los Angeles bago manaig sa kanyang one-on-one match kontra sa babaeng world pool champion na si Jeanette Lee.