Husay sa mga Duterte

Kon madayon ang impeachment ni Bise Presidente Sara Duterte sa House of Representatives ug ang husay sa articles of impeachment batok niya sa Senado ug tumanon ni kanhi Presidente Rodrigo Duterte ang saad nga mahimong kabahin sa defense panel sa iyang anak:

• Mahimo siya nga labing una nga kanhi presidente sa kasaysayan sa Pilipinas nga makaapil og impeachment trial isip abogado; ug

• Mahimo sila nga labing unang amahan ug anak nga kabahin sa impeachment trial, si Bise Presidente Duterte isip sinumbong ug si kanhi Presidente Duterte isi defense counsel.

* * *

Wala igdungog ang amahan ug anak sa mga husay nga ilang naapilan. Walay nangahas pagkiha nila sa pasangil nga maoy mga utok sa laktod nga pinatyanay sa Davao Death Squad (DDS) sa sila pay mayor ug bise mayor.

Wala dutli og kaso si Sara sa mayor pa bisan sa iyang pagkulata og court sheriff nga igo lang nipatuman sa lehitimong demolition order sa korte. Gi-absuwelto si Rodrigo ni kanhi Supreme Court Associate Justice ug karon Ombudsman Samuel Martires sa kasong gipasaka sa iyang karibal nga si anhing House Speaker Prospero Nograles.

* * *

Mapagarbuhon si Duterte sa iyang pagka piskal pero dili gustong mahibaw-an ang sirkumstansiya sa una niyang trabaho: Natudlo siyang second assistant fiscal sa Davao City dili tungod sa iyang katakos kon dili tungod sa kaluoy.

Dihang nahimong abogado, walay nikuha sa iyang serbisyo. Gawas sa pipila sa mga silingan nga nagpa-notaryo. Maong gihangyo sa mga higala sa iyang amahan ang justice minister sa diktadura ni Ferdinand Marcos Sr. sa paghatag niya og trabaho.

* * *

Wala sab igdungog ang amahan ug anak sa ilang kamasinugtanon sa balaod. Mas daghan ang pasangil sa ilang pagpanlaktod ug pagpanyatak sa mga lagda sa sila pay nagdumala sa Davao City Hall ug sa paghupot og nasudnong mga puwesto.

Maong angay nga mangandam nang daan si Senate President Chiz Escudero isip presiding officer sa impeachment trial ug iyang kauban nga senator judges sa posibleng kalit nga pag-ulbo sa sinumbong ug sa iyang abogado sa pagkuwestiyon sa kamakiangayon sa husay ug, nakatag-an ka, sa pagpamuyboy sa tanang nakapangayo ug nakadawat og mga pabor gikan sa niaging administrasyon.

* * *

[email protected]