Nagplanong mopasaka og legal separation

Dear Atty. Divine,

Nagplano ko nga mopasaka og legal separation batok sa akong bana tungod sa iyang pagka abusive ug pagka womanizer. Usa siya ka seaman ug aduna mi duha ka anak nga pulos nagtungha sa kolehiyo. It’s been 2-years nga wa na siya mouli sa amoa ug ako nalang nahibaw-an nga anaa siyay laing babaye ug adto siya mag-stay sa iyang babaye sa matag higayon nga mouli siya sa Pilipinas. Wa na sab mi communication sud na sa duha ka tuig ug wa na siya mokontak bisan sa iyang mga anak. Wa siya masuporta kanamo sud na sab sa duha ka tuig. He cheated on me many times ug makadaghan na sab ko niya mabun-og every time nga ako siyang i-confront labot  sa iyang mga babaye. Aduna koy gamay nga negosyo ug mao kini karon ang akong gigasto sa pangtungha sa akong mga anak ug sa among inadlaw nga panginahanglan. Ang akong pangutana kun unsa may legal effect sa among kaminyuon kun mopasaka ko og legal separation batok sa akong bana? Daghang salamat. -- Liza

* * *

Dear Liza,

Ang legal separation nagtugot sa magtiayon to live separately apan dili sila mamahimo nga makaminyo pag-usab tungod kay ang marriage nagpabilin pang valid ug subsisting bisan pa kun ma grant sa korte ang legal separation. Busa, bisan kon kamo legally separated na, entitled gihapon ka og support isip asawa gikan sa imong bana kay wa man maputol ang inyong kaminyoon. Obligado sab ang imong bana nga mosuporta sa inyong mga anak nga nagtungha pa hangtud nga sila maka graduate sa kolehiyo. Laing legal effect niini, kun aduna moy kabtangan, mamahimo sab kini ninyong bahinon basta kamong duha magkauyon apan nagkinahanglan og approval sa korte ang inyong kasabutan labot sa separation of properties. Kun ang property nga inyong i-divide naka mortgage pa, dili kini ninyo mahimong ibaligya hangtud nga dili ninyo mabayran ang mortgage niini. Ang grounds sa legal separation gilatid sa Article 55 sa atong Family Code ug kini naglakip sa Repeated physical violence og Abandonment for more than a year. Hinaut nga akong natubag ang imong pangutana. Thank you and God Bless. -- Atty. Divine

Alang sa inyong pangutana, ipadala lang sa pag email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.