EDITORYAL — Ang Pasko Para sa Tanan

Unyang gabii sugaton nasab sa mga Kristiyano ang Pasko.

Maguban ug magkatapok ang mga pamilya ug managhigala alang sa salosalo ug kalingawan.

Apan maayo sab tingaling hinumdoman sa tanan nga samtang kita nagkasadya, aduna pud tay nga kaigsuonang wala gani bisan pansit sa ilang lamesa karon, pagkaon nga magpatapok kanila sa ilang panimalay sama sa Sagrado Pamilya.

Apan dili masukod ang tawo pinaagi lang sa gidaghanon sa pagkaon ibabaw sa lamesa, o ba kaha sa mga bag-ong sapot ug sapatos.

Ang diwa sa Pasko mao ang pagpaambit ngadto sa uban, bahala og unsa ka gamay.

Ang mga kabus karon gamay lang og apason para malangit, tungod kay sila, kasagaran bisan unsa pa kagamay nga naa nila, mabuhat man gihapon nila ang motabang sa uban.

Sila maoy labing bulahan, tungod kay sila ang pinili sa tanan aron sagubangon ang mga pagsuway ug pagsukod sa ilang pagtuo, kay giisip sila nga maoy labing banggiitan sa tanang sugo sa Kahitas-an.

Ang mga magpanghitas-on ug ang mga magpakaaron-ingnon nga nakatabang apan  dili kinasingkasing , taas pa kaayo og latason.

Busa, angay hinumdoman sa tanan nga ang Pasko dili lang para sa mga adunahan.

Gikan diri namo sa Banat News, maayo ug malipayong Pasko kanatong tanan.