EDITORYAL - Nawad-an og paglaum sa 2025

Dunay mga Pilipino ang matud pa ubos kaayo og panglantaw ug paglaum nga moasenso sila sa umaabot nga tuig 2025, kana kun tuohan ang resulta sa gihimong survey sa Social Weather Stations (SWS).

Matud pa sa survey, mas daghan sa mga Pilipino karon ang nabalaka sa ilang ugma sa sunod tuig. Apan wala ba kaha masayop ang survey? Kay matud pa niini 90 porsiyento sa mga Pilipino ang matud pa ang malaumon, 10 porsiyento ra maoy nabalaka para karong tuiga.

Ilaha kining gitandi sa 2023 survey nga matud pa 96 porsiyento sa mga Pilipino ang malaumon kaniadto, sa ato pa kwatro porsiyento lang ang nawad-an og paglaum.

Kun kini maoy ilang gibasihan, nisaka gyud ang gidaghanon sa mga nawad-an og paglaum o ba kaha walay nakitang kahayag para sa ilang ugma sa tuig 2025 kay miabot man og 10 porsiyento.

Apan kining maong survey, mura man og nakapalibog naman hinuon sa mga tawo kay mas dako man gihapon ang porsiyento sa mga malaumon kun itandi sa mga nawad-an og paglaum.

Apan anha lang naklaro ang deperensiya pagtandi sa nakalabay nga mga surveys sama sa tuig 2009 nga matud pa 89 porsiyento lang ang nipadayag og paglaum.

Bisan gani kuno sa mga estudyante sa kolehiyo, nius-os sab ang kaniadto 98 porsiyento karon nahimo nalang nga 96, sa ato pa gikan sa dos porsiyento nahimo ng kwatro porsiyento ang nawad-ag paglaum. Sa senior high school education, gikan 96% nius-os sab ngadto sa 93%.

Kung buot gyud tan-awon, kaning panglantaw sa tawo sa ilang ugma naimpluwensiyahan gyud sa mga nanghitabo sa ilang palibot. Kun magpadala sa sitwasyon ug dili molighot dili maayo ang padulngan.

Hinuon, angay ba nga magpaapektar ang mga tawo aning surveys? Kung manikay-sikay lang gyud ang kada usa , sigurado gyung moasenso, dili lang sa pangwarta , karera, pagtungha ug uban pa.