Celtics wala mabalaka
CEBU, Philippines — Nagdahum unta sa ilang koronasyon didto sa Dallas, apan ang Boston Celtics nakasinati hinoon sa labing pait nga kapildihan sa kasaysayan sa ilang prangkisa.
Kini human sila gimasaker sa Mavericks, 122-84, sa Game 4 sa NBA Finals niadtong Sabado didto sa American Airlines Center.
Apan alang ni Jaylen Brown, dili kini angayan nga ikabala sa Celtics ilabi na kay nagkupot gihapon sila og 3-1 nga labaw sa serye.
Nagkanayon si Brown nga ang makapadismaya nilang kapildihan angayan nilang panaminan ug kuhaan og leksiyon.
"We have to reassemble," matud pa ni Brown. "We have to look at it and learn from it, and then we've got to embrace it and attack it."
"It's going to be hard to do what we're trying to do. We didn't expect anything to be easy, but it's no reason to lose our head," padayon pa ni Brown.
Sa iyang bahin, si Boston forward Jayson Tatum nagkanayon nga dili nila dapat dibdibon ang maong kapildihan inay himoon kini nilang hagit aron makabawi sa sunod nga duwa.
"We're not making any excuses," padayag pa ni Tatum. "We need to be better, and we will."
Ang Celtics mosuway pagpatikangkang sa Mavs sa hingpit sa Game 5 karong Martes (Hunyo 18 oras dinhi sa Pilipinas) didto sa TD Garden sa Boston, Massachusetts.
Nanginahanglan sila og usa na lang ka daog aron mokulit og NBA rekord uban ang 18 ka titulo.
Hayag na kining makab-ot sa Celtics gumikan kay sa kasaysayan sa NBA, wala pa may team nga nakabangon human maunhi og 3-0 sa usa ka best-of-seven series.
Masaligon hinoon ang Mavs nga silay makabuhat niini ilabi na kay nadasig sila ug naka-angkon og bag-ong paglaum human sa 38 puntos nilang demolisyon sa Celtics.
"History is going to be made either way," dason pa ni Mavs guard Kyrie Irving. "We'd like to be on the right side of it."
"We waited until game four to ultimately play our best game. Took long enough for all of us to get the party together and to play for each other the way we did," dugang pa ni Irving. "But it's definitely a possibility that we can replicate it."
- Latest
