Mga smuggler ng yosi isumbong — Malakanyang

MANILA, Philippines — Hinikayat ng Malakanyang ang publiko, lalo na sa Mindanao, na i-report ang mga hinihinalang sangkot sa smuggling ng sigarilyo.

Ayon kay Palace Press Officer Claire Castro, bagama’t nagpapatuloy ang operasyon ng Bureau of Customs (BOC), Philippine National Police (PNP) at National Bureau of Investigation (NBI), mayroon pa ring mga kontrabandong nakalulusot.

Binigyang-diin ni Castro na malaking kawalan sa kita ng gobyerno ang ilegal na bentahan ng smuggled na sigarilyo dahil hindi ito nagbabayad ng tamang buwis. Aniya, mahalagang makiisa ang publiko upang matukoy at mapanagot ang mga responsable.

Ginawa niya ang pahayag kasabay ng sunod-sunod na pagkakasabat ng mga awtoridad sa milyun-milyong pisong halaga ng kontrabando sa iba’t ibang bahagi ng Mindanao.