Alas gagawin ang lahat vs Vietnam

Kenya giba sa Puerto Rico

MANILA, Philippines — Matapos gumawa ng kasaysayan sa nakaraang 2024 AVC Challenge Cup ay muling magtatangka ang Alas Pilipinas na maduplika ito sa kanilang pagsagupa sa Vietnam sa FIVB Women’s Volleyball Challenger Cup.

Nakatakda ang knockout quarterfinal match ng mga Pinay at Vietnamese spikers ngayong alas-6:30 ng gabi sa Ninoy Aquino Stadium sa Malate, Manila.

Sa unang laro sa alas-3 ng hapon ay magtatapat ang Czech Republic at Argentina.

Sa hindi paglalaro nina Eya Laure, Jen Nierva at collegiate star Alyssa Solomon ay ginawa ni Brazilian coach Jorge Souza de Brito si Jema Galanza na libero para makatuwang ni Dawn Macandili.

Ngunit kamakalawa ay ibinalik ni De Brito ang Creamline star na si Galanza sa kanyang natural outside hitter role kasabay ng paglalagay kay 5-foot-10 middle blocker Chery Nunag sa libero.

“You may not know the real reasons or stories behind it, but tough decisions are not made for nothing,” sabi ni team captain Jia De Guzman sa naging palitan ng posisyon sa Alas Pilipinas.

Nauna nang inilagay ni De Brito, iginiya ang mga Pinay spikers sa bronze medal finish sa nakaraang AVC Challenge Cup, si collegiate superstar Angel Canino sa opposite hitter role mula sa nilalaro nitong outside hitter position.

Sakaling malusutan ang reigning Challenge Cup champion Vietnam ay papasok ang Alas Pilipinas sa knockout semifinals.

Samantala, tinalo ng Puerto Rico ang Kenya, 25-20, 25-19, 27-25, papasok sa knockout semifinals.

Humataw sina Diana Reyes at Grace Mar Lopez ng pinagsamang 29 points para sa World No. 15 ranked team.