Japan training camp makakatulong sa Alas
MANILA, Philippines — Makakabuti sa Alas Pilipinas ang training camp sa Osaka, Japan para mas lalong mapatibay ang kanilang samahan sa loob at labas ng volleyball court.
Ito ang sinabi ni Brazilian coach Jorge Edson Souza de Brito para sa paghahanda ng mga Pinay spikers sa darating na two-leg Southeast Asian Volleyball League (SEA V.League) sa Agosto at ang 33rd Southeast Asian Games sa Disyembre ng 2025 sa Thailand.
“What we really have to do is we need to have our players spend more time together to work, so we can add something in the system that would be applicable. It’s step-by-step,” ani De Brito.
Idinagdag ni De Brito sa Alas Pilipinas pool si Creamline star Jema Galanza at sina UAAP champions Alyssa Solomon at Bella Belen ng National University Lady Bulldogs.
Sa 14-25, 22-25, 21-25 kabiguan ng mga Pinay spikers sa mga Vietnamese sa knockout quarterfinals ng 2024 FIVB Women’s Challenger Cup ay hindi naglaro sina Solomon, Eya Laure at Jen Nierva.
Nakatakda ang training camp ng tropa sa Osaka sa Hulyo 14 hanggang 25.
“Hopefully, we can keep these players. since we have (roughly) 14 days in Japan to practice,” ani De Brito na iginiya ang Alas Pilipinas sa makasaysayang bronze medal finish sa 2024 AVC Challenge Cup na pinagreynahan ng Vietnam noong Hunyo.
“Hopefully we’ll be better, chemistry will be better because every single day training together two times a day,” dagdag ng 57-anyos na assistant coach ng Brazilian women’s national team na pumalo ng gold medal sa 2008 Olympic Games sa Beijing, China.
- Latest
