Nuggets amoy na ang sweep sa Lakers
LOS ANGELES — Humakot si Aaron Gordon ng playoff career-high 29 points at 15 rebounds para akayin ang nagdedepensang Denver Nuggets sa 112-105 paggupo sa Lakers sa Game Three at kunin ang 3-0 lead sa Western Conference first-round playoff series.
Kumolekta si Nikola Jokic ng 24 points, 15 rebounds at 9 assists para sa paglapit ng Denver sa sweep sa Los Angeles papasok sa second round.
Nag-ambag si Jamal Murray ng 22 points para sa pang-pitong sunod na playoff win ng Nuggets sa Lakers.
May 20 markers si Michael Porter Jr. para sa Denver na tuluyan nang kinontrol ang third quarter patungo sa panalo sa Los Angeles na winalis nila sa nakaraang Western Conference Finals.
Nagposte si Anthony Davis ng 33 points at 15 rebounds, habang may 26 markers si LeBron James sa panig ng Lakers na hindi pa tinatalo ang Nuggets simula noong Disyembre 16, 2022.
Nakatakda ang Game Four bukas (Manila time) sa Los Angeles kung saan wala pang NBA team na nakabalik at nanalo mula sa isang 0-3 playoff deficit.
Sa Philadelphia, humataw si Joel Embiid ng 50 points kasama ang anim na three-point shots para gabayan ang 76ers sa 125-114 panalo sa New York Knicks sa Game Three.
Idinikit ng Philadelphia sa 1-2 ang kanilang Eastern Conference first-round playoff duel ng New York.
Binanderahan ni Jalen Brunson ang Knicks mula sa kanyang 39 points at 13 assists.
Sa Orlando, nagkadena si Paolo Banchero ng 31 points at 14 rebounds, habang may 24 markers si Jalen Suggs sa 121-83 pagmasaker ng Magic sa Cleveland Cavaliers sa Game Three at makalapit sa 1-2 sa kanilang first-round playoff series.
Umiskor si Franz Wagner ng 16 points para sa pagbangon ng Magic mula sa 0-2 agwat.
Naglista si Jarrett Allen ng 15 points at 8 rebounds para sa Cavaliers.
- Latest
