PVL bubuo ng national team para sa AVC tourney

MANILA, Philippines — Ang mga kagaya nina Alyssa Valdez, Tots Carlos at Jema Galanza ng Creamline, Sisi Rondina ng Choco Mucho, Eya Laure ng Chery Tiggo at Jonah Sabete ng Petro Gazz ang posibleng bumuo sa Philippine national team na isasabak sa Asian Volleyball Confederation (AVC) Challenge Cup for Women.

Ito ay matapos ibigay ng Philippine National Volleyball Federation (PNVF) sa Premier Volleyball League (PVL) ang responsibilidad na pumili, magsanay at mamahala sa national women’s team.

“This is a landmark decision by the PNVF board and we are looking forward to the PVL forming the strongest women’s national team ever,” ani PNVF president Ramon “Tats” Suzara.

Nabuo ang desisyon ng PNVF matapos ang kanilang board meeting noong Abril 12 sa Seda Nuvali kasabay ng pagdaraos ng FIVB Beach Pro Tour sa Santa Rosa City.

Sina PNVF vice president Ricky Palou at national team commission head Tonyboy Liao ay president at chairman, ayon sa pagkakasunod, ng Sports Vision na nagmamay-ari at namamahala sa PVL.

Isasalang ang mabubuong tropa sa AVC Challenge Cup for Women sa Mayo 22 hanggang 29 sa Rizal Memorial Coliseum.

Bukod sa Philippine national team ay sasabak din ang mga koponan ng Kazakhstan, Iran, Chinese Taipei, Vietnam, Australia, Hong Kong, Singapore, Indonesia at India.

Si Brazilian Jorge Edson de Brito, ang FIVB-assigned coach para sa Pilipinas, ang hahawak sa women’s national team.

Nakipagkasundo rin ang PNVF sa Cignal TV ng MVP Group bilang official partner para sa men’s national team na papalo sa 32-team FIVB Men’s World Championship 2025 na pamamahalaan ng bansa sa Setyembre ng 2025.