Otom, Gawilan humirit ng ginto
MANILA, Philippines — Umarangkada ang Pinoy tankers at trackster nang pamunuan nito ang paghakot ng Team Philippines ng tatlong gintong medalya sa 12th Asean Para Games na ginaganap sa Morodok Aquatic Center sa Phnom Penh, Cambodia.
Nagpasiklab si Angel Otom na nasiguro ang kanyang ikatlong gintong medalya sa torneo.
Idinagdag ni Otom sa kanyang koleksiyon ang ginto sa women’s 50m butterfly S5 event matapos magtala ng 47.33 segundo.
Tinalo ni Otom sina Vietnamese Nguyen Thi Sari at Danh Thi My Thanh nagtala ng 1:17.31 at 1:31.18, ayon sa pagkakasunod.
Una nang humirit ng ginto si Otom sa women’s 50m backstroke S5 at sa women’s 200m individual medley.
Sa kabilang banda, patuloy ang pananalasa ni Ernie Gawilan na naghari sa 200m men’s individual medley SM7.
Nagsumite si Gawilan ng 2:50.29 upang patumbahin ang Vietnamese bets na sina silver medalist Nguyen Hoang Nha at bronze winner Han Quang Thoai.
Nasiguro ni Gawilan ang kanyang unang ginto sa men’s 400m freestyle S7 noong Linggo.
Kasama nina Otom at Gawilan sa listahan ng mga nakarami na ng ginto na sina Ariel Joseph Alegarbes at Gary Bejino.
Namayagpag si Alegarbes na kumana ng dalawang ginto sa swimming event sa men’s 200m individual medley SM14 at 50m butterfly S14 events.
Nakadalawang ginto rin si Bejino sa men’s 200m freestyle S6 event at 400m freestyle S6 event.
Samantala, nagdagdag ng ginto si Evaristo Carbonel sa men’s discus throw F11 sa Morodok Techo Stadium.
Umiskor si Carbonel ng 25.67m para angkinin ang ginto kina silver medalist Awang Raduan - Awang Haji Mataha ng Brunei (20.99m) at bronze medalist Vann Chamroeun ng Cambodia (14.92m).
- Latest
