NAIA T4: Huling biyahe na ba?

May mga gusali talagang hindi basta gusali. May mga pader na tila may sariling kuwento at sa NAIA Terminal 4, ilang dekada ring buhay ng mga Pilipino ang dumaan sa pintuan nito.

Kaya nakakapukaw ng pansin ang bagong balita: hindi na raw matutuloy ang planong rehabilitasyon ng Terminal 4.

Ayon kay MIAA General Manager Eric Ines, ipinaalam umano ng New NAIA Infrastructure Corp. (NNIC) na hindi na nito itutuloy ang nakatakdang pagsasaayos sa lumang terminal. Sa ngayon, verbal pa lamang umano ang abiso at wala pang pormal na liham na natatanggap ang MIAA.

Mas kapansin-pansin ang kapalit ng dating plano.  Ang dating International Cargo Terminal area na inilaan para sa upgraded Terminal 4 ay gagamitin na lamang bilang aircraft parking area.

Kung tutuusin, praktikal ang paliwanag. Lumalaki ang bilang ng flights, dumarami ang pasahero, kaya kailangan din ng mas maluwag na espasyo para sa mga eroplano.  Pero bilang isang lumang pasilidad ng NAIA, hindi maiiwasang itanong: ito na ba ang huling kabanata ng Terminal 4?

Dating Manila Domestic Passenger Terminal ang T4. Dito dumaan ang napakaraming biyaherong bumiyahe sa loob ng bansa bago pa man maging ganito kasiksik at kalawak ang operasyon ng NAIA.

Noong 2024, isinara ito para sana sa renovation at safety upgrades. May mga umaasang muling bubuksan ang isang mas maayos at modernong T4.

Ngayon, tila ibang direksiyon na ang tinatahak.

Hindi naman masamang magbago ng plano kung may mas malaking pangangailangan ang paliparan. Ang ma­halaga, malinaw sa publiko kung bakit nagbago ang de­sisyon at kung ano ang magiging tunay na kapalaran ng lumang terminal.

Dahil sa bawat pagbabago sa NAIA, hindi lang konkretong gusali ang pinag-uusapan.

May kasaysayan. May alaala. May mga pamilyang naghahatid at sumasalubong. May mga pasaherong minsang dito nagsimula ang biyahe at dito rin nagbalik.

Samantala, umaandar ang konstruksyon ng NAIA Terminal 5 sa dating Philippine Village Hotel site, na target matapos sa pagtatapos ng 2027.

Baka panahon na nga para sa bagong kabanata ng NAIA.  Pero sana, bago tuluyang maisara ang isang lumang pinto, masabi muna sa publiko kung bakit kailangang isara at saan hahantong ang mga kuwentong naiwan sa loob nito.

Minsan, ang pinakamabigat na goodbye ay hindi sa taong umaalis kundi sa lugar na matagal mong hinihintay na muling mabuhay.