EDITORYAL - Amongon diay ang uban?

Daghang mga maayo og tumong apan dili mao ang pamaagi. Usahay ang pamaaging gustong buhaton makasakit na sa uban ug ang grabe makalapas na hinuon sa katungod sa uban nga gigarantiyang dili tamakan ubos sa Konstitusyon.

Apan naa gyuy mga tawong gustong i-shortcut ang tanan. Tinuod daghang nahitabong ingon ana, parehas nalang sa nahitabo sa war on drugs, daghang ni-shortcut, pero karon sila maoy naipit tungod sa wala nila pagsunod sa balaod.

Mao sab ni unya ang mahitabo anang panawagan ni DILG Secretary Jonvic Remulla nga gustong ipausab ang kasamtangang implementing rules and regulations (IRR) sa balaod bahin sa pag-angkon og mga lisensyadong mga armas.

Nagpasabot ni nga apil ang mga otoridad nga giisyuhan aning mga armas sa gobiyerno ug mga pribadong mga indibidwal nga namalit, nagbayad og rehistro ug lisensya ug nibayad og buhis para ani.

Gusto ni Remulla nga hatagan og gahum ang kapolisan nga pisikal nga moadto sa mga panimalay sa mga gunowners para mag-inspeksyon ug susihon kun naa ba silay saktong butanganan sa ilang mga armas.

May koneksyon ni sa nahitabong mga school shootings diin nasuta nga apil sa mga gigamit nga armas sa krimen, gipanagiya sa gobiyerno nga nakuha sa mga menor de edad nga maoy nagbuhat sa krimen.

Usa pa, kung ang rason ni Remulla tungod sa nahitabo sa duha ka government issued firearms nga nagamit sa krimen, angay ba diay maamong ang sobra usa ka milyon ka mga lisensiyadong gunowners, ilabi na mga sibilyan ni kadaghanan?

Kung mahinumdoman, sa panahon ni kanhi presidente Rodrigo Duterte sa dihang nideklarar siya og war on drugs ug iyahang duphan ang mga polis bisan og makapatay pa sila atol sa anti-drug operations.

Daghan tuod ang napatay nga drug personalities apan daghan man sab ang nangapagan ug kwestyonable sab ang kamatayon sa uban maong naa karon sa prisohan si Duterte ug naay mga polis nga nangapriso tungod ato.

Karon ang pangutana, dili ba kaha ni maabusar na sad nga ekstrang gahum? Nganong gikinahanglan mang tagsa-tagsahon og adto ug pangsudlon ang mga balay para inspeksyonon? Dili ba na paglapas sa pribasiya sa mga gunowners?