Epicenter sa flood control

Namahayag si Ombudsman Jesus Crispin Remulla nga imbestigahon sa ilang ahensya ang Davao City nga gituohan kuno nga maoy “epicenter” sa mga flood control projects sa wala pa ang Marcos administration.  Kon sundan nato ang logic ni Remulla, diin gihigot niya ang kurapsyon sa flood control sa lugar sa kon kinsa ang presidente, dan mahimo usab nato ingnon nga karon nga administration ang “epicenter” anaa na usab sa Ilocos Norte. Angayan mag-amping si Remulla sa iyang pamahayag kay ginaingon baya nga, “Ang hinanali nga paghukom maoy unang lakang sa pagbakwi unya sa gipamulong.” Muleeng!

Wa man gani gilung-ag

Matud pa sa Philippine Rice Research Institute (PhilRice), gibanabana nga matag Filipino maglabay/mag-usik og duha ka kutsara nga kan-on matag adlaw, katumbas sa 10.85 million ka sako sa bugas nga mokabat og P24.4 billion matag tuig.  Damay na usab sa pasangil sa PhilRice  ang mga kabus ni’ng kalakiha.  Naghimo na usab ang Department of Agriculture og laing rason nga kapasanginlan sa kakulang sa suplay sa bugas. Apan matud pa sa akong silingan, “Unsa ma’y ilabay nga kan-on sa mga kabus nga wala man gani usahay gilung-ag.” Mao maan!

Nangita’g solusyon sa baha

Matud pa ni Kenneth Siasar, Chief of Staff ni Cebu City Mayor Nestor Archival, upat lang sa 65 ka real estate developers nga gitumbok sa kagamhanan sa dakbayan sa Sugbo nga posibleng nakatampo sa pagbaha, ang misumiter sa ilang flood mitigation plans ug detalya sa mga detention ponds.    Karon pa pasumitihon og plano ang mga developers nga nahuman o nasugdan na ang proyekto nga kabahin man unta kini sa rekisitos una aprobahan ang proyekto. Matud pa sa usa ka city hall observer nga, “Ang solusyon sa gobyerno sa baha mao ang pag-umol og komitiba aron mo-imbestigar kon ngano’ng modagayday ang tubig paingon sa ubos.” Fezteleern!

Nasangit sa trapik

Gi-proponer ni Cebu City Vice Mayor Tomas Osmeña ang pagtoon sa 30-minute daily restriction sa mga pribadong sakyanan sa pagbiyahe atol sa rush hour aron mahatagan og prayoridad ang publikong sakyanan sa panahon sa grabeng trapik sa kadalanan.  Angay nga tun-an pag-ayo ang maong proposal tungod sa lawom nga implikasyon niini, dili lang sa trapiko kon dili sa ekonomiya usab. Matud pa sa akong silingan, “Hinaut unta nga ang tugyanan sa pagtuon sa maong proposal dili masangit sa trapik aron madayon gayon ang ilang pagtuon.” Madahaan!

Espiya sa dnd

Gikompirmar ni Defense Secretary Gikbert Teodoro nga daghan nga empleyado sa iyang departamento ang gi-recruit sa China aron himoong espiya nga mahimong mohatag og mga sensitibong inpormasyon.  Bisan nasanta na, dili pa segurado ang kalihim kon dili na ba kini mahitabo pag-usab.  Makapaduda sa katawhan kining panghitabo bahin sa katakos sa maong ahensya. Sugyot sa usa ka kritiko, “Kon magsige ang maong panghitabo, inay nganlan ang ahensya og Department of National Defense, ilisan na lang kini ngadto sa “Department of National Defectors.” Pagkatoytoy!