Archival nanilhig

Nakakita ba mo sa hulagway ni Cebu City Mayor Nestor Archival nga nanilhig didto sa kabalayan sa Barangay Pasil?

Nindot ang iyang gipakita kay nagpasabot ni nga gusto siya og limpyo ug hapsay nga siyudad, ug tingali tan-aw niya sa mga kawani sa City Hall dili kini kamao manilhig, iyang gipakita unsaon ang hustong pagpanilhig.

Pero dunay uban nga nakakita nga nangyamiid, ug mihulagway nga pamolitika ra kini sa mayor. Ang mga lumolupyo sab sa Barangay Pasil naghinan-aw lang nga nanilhig ang mayor, ambot og may nauwaw ba kanila.

Nindot ning gihimo sa mga kawani sa Cebu City Hall nga panahon sa Sabado ug bisan Domingo, maglihok sila sa paglimpyo sa mga drainage system aron nga kon mag-uwan, dili kaayo makalunop.

* * *

Ako wa ra gyud ko’y supak kon himoon ang gisugyot ni Cebu City Vice Mayor Tomas Osmeña nga dili usa paagion sa mga busy roads ang mga private vehicles, bisan bali lang og tunga ngadto sa usa ka oras.

Ang tumong ni Osmeña aron nga makatabang kini sa pagpahapsay sa atong mga karsada nga ang tugutan nga makaagi kadto lang mga public utility vehicles.

Sayon ra man na, kay kon gusto ka nga dili maapektohan sa ipatuman nga “Car ban” mosayo ka paglakaw, unya planohon nimo kon asa ka moagi.

Human sa usa ka oras nga car ban, pwede ka na man nga moagi. Maayong suwayan ang paghimo og experimental niining maong sugyot. Apan mao lagi, basin baya og dunay mga sakyanan nga mag-siren ha?

Matud pa ra ba ni Osmeña nga si Mayor Archival maoy “No. 1” traffic violator, ilabi na diha sa Banilad-Talamban Road. Ambot nganong nakaingon kaha niana si Tommy.

* * *

Uy, kalit lang kuno nga natumba ug nalamba sa sawog si Senador Jinggoy Estrada samtang naligo siya sulod sa New Quezon City Jail sa Payatas, Quezon City kaganinang buntag.

Sigun sa mga news sources sa Quezon City Jail nga ang senador nag-andam na unta alang sa iyang X-Ray procedure diha nga mikalit lang nga nakabatyag siya’g sakit sa iyang tuhod, ug wa na niya maagwanta ang kasakit.

Tungod niini, napasayo ang pagpahigayon sa X-Ray procedure ni Jinggoy didto sa Cardinal Santos Medical Center.

Gitugotan si Estrada sa Sandiganbayan nga mapagawas sa bilanggoan alang sa dinaliang check-up kabahin sa iyang gibatyag nga osteoarthritis.

Mahinumdoman nga si Estrada gipriso karon tungod kay gilambigit siya sa mga anomalosong flood control project sa kagamhanan. Pero ang uban miingon nga basin og inartista lang ning pagkatumba ni Jinggoy.