Dako na ang pahalipay

Nanawagan si kanhi Speaker Martin Romualdez sa Ombudsman nga i-dismiss na ang kaso’ng plunder, graft ug ubang criminal complaint nga gipasaka batok kaniya kabahin sa iyang kalambigitan sa anomaliya sa flood control projects tungod kay mibalitok na man ang testigo nga si kanhi Marine Orly Guteza busa wala na kuno’y basehan ang sumbong batok kaniya. Daghan ang rason ngano nga mobalitok ang usa ka testigo. Ni’ng pagbalitok ni Gualiza, daw nadungog nato nga miingon siya nga, “Lahi na ang akong nahinumduman karon sa panghitabo kay lahi ug dako na man usab ang gihatag kanako nga pahalipay.” Fezteleern!

Nahanaw’ng pinulongan

Bisan pa man sa tinuig nga pagsaulog nato sa Buwan ng Wika, gibanabana sa Komisyon sa Wikang Filipino (KWF) nga 40 sa 135 ka indigenous nga pinulongan sa Pilipinas nag-anam na pagkahanaw tungod sa “social, cultural, and political factors” nga naka-apektar sa ilang preserbasyon ug pagpalambo.  Sagad sa atong kabatan-onan karon aduna na’y negatibong kinaiya ngadto sa ilang kaugalingon’g pinulongan. Matud pa sa mga apohan, “Mahanaw ang atong pinulongan kay mag-imbento man ang mga batan-on og bag-ong mga pulong aron dili sila masabtan kon moreklamo ug magtubag-tubag sa ilang ginikanan.” Muleeng!

Naproblema sa PDEA

Lima ka mga job order personnel sa Cebu City, diin tulo niini empleyado sa CCDRRMO ug ang 2 empleyado sa Cebu City Sports Center (CCSC) ang nasakpan nga positibo sa ginadiling druga human sa gipahigayon nga surprise drug test sa PDEA-7.  Pipila lang kining maong mga empleyado nga matawag nga adik apan naghatag kini sila’g mantsa niadtong nagtinarong sa ilang trabaho. Sa dihang gipangutana kuno ang mga nasakpan nga empleyado kon unsay ilang ikasulti sa ilang kahimtang, igo lang silang mitubag nga, “Wala man mi problema nga nigamit mi’g drugas, ang problema kay naay PDEA manakop.”  Ateerr!

Dili gihapon motunhay

Buot una suta-on sa mga vendors sa Carbon Public Market gikan sa opisyal sa dakbayan sa Sugbo ug sa developer kon unsay klarong detalya sa ilang relokasyon, stall assignments ug abang sa dili pa sila mobalhin sa bag-o unya’ng building.  Andam kuno mobayad ang mga vendor sa i-imponer nga market fees basta magmalipayon lang usab sila.  Bisan pa ni’ng pamahayag sa mga vendors, gituohan sa mga observers sa city hall nga dili gihapon mahapsay ang kahimtang sa mga vendors. Matud pa nila, “Samtang adunay pamolitika ug pangwarta nga mahitabo diha sa Carbon Public Market, layo ra sa tinuod nga matunhay ang kahimtang sa Carbon.” Madahaan!

“Lord, patawad”

Sa labing uwahing Tugon ng Masa survey sa OCTA Research, nasayran nga sa ikaduhang quarter sa 2026, midaghan ang mga pamilyang Pilipino nga nakasinati og kagutom ug mihulagway sa ilang kahimtang nga kabos.  Mora’g mao na man kini ang trend sa kahimtang sa mga Pinoy ug dili na ikahibulong ang resulta ni’ng maong survey.  Matud pa bitaw sa usa ka call center worker,“Dinhi ra sa Pinas nga bisan bag-o pa ka’ng misweldo, inig tan-aw nimo sa imong pitaka, makatuaw ka pag-ingon nga ‘Lord, Patawad’.” Pagkatoytoy!