Bullying na nauuwi sa karahasan

Hindi na simpleng tukso o biro ang bullying sa mga paaralan. Ang panibagong insidente ng pananaksak ng Grade 9 student sa kanyang kaklase sa Las Piñas City kamakailan ay matinding paalala na ang pang-aapi, kapag hindi natutugunan, ay maaaring lumala at humantong sa trahedya. Ang mga bata at kabataan na araw-araw na binubugbog ng salita, pangungutya, o pisikal na pananakit ay nagdadala ng sugat na hindi agad nakikita hanggang sa ito’y sumabog sa anyo ng karahasan.

Ang bullying ang tila madalas na nagiging ugat ng trahedya sa mga paaralan. Ang paulit-ulit na pang-aapi ay nagdudulot ng depresyon, anxiety, at galit na naiipon. Maraming kabataan din ang walang outlet para mailabas ang nararamdaman dahil maaaring takot silang magsumbong, walang tiwala sa guro o magulang. Minsan nga sa kaibigan pa nag-o-open pero madalas sinasarili na lang. Kapag hindi na kaya ng biktima, minsan ay nauuwi sa marahas na tugon.

Hindi sapat na sabihing “bata pa ’yan, nagbibiro lang.” Ang paaralan, magulang, at pamahalaan ay may tungkulin na tiyakin ang kaligtasan ng kabataan.

Kapag pinabayaan ang bullying, hindi lang bata ang nasasaktan, buong komunidad ang nagdurusa. Panahon na para gawing seryoso ang laban kontra pang-aapi, bago pa ito muling mauwi sa dugo at luha.