Ang krus ingon nga usa ka tinun-an

Hunyo 28, 2026: Ikanapulog- Tulo nga

Domingo sulod sa tuig

 Mga Pagbasa:   2 Har. 4;8-11,14-16a/

Sal. 89/Rom. 6;3-4, 8-11/Mt. 10;37-42

Maayong Balita

Gihatag sa atong Ginoong Jesus ang mga kondisyones niadtong buot nga mamahimong mga tinun-an. Kinahanglang ang usa ka tinun-an dili molingi lingi ug nga iyang ipunting ang iyang kaugalingon alang sa kalihukan alang sa iyang magtutudlo way lain ang Ginoong Jesus.

Kinahanglang maantigo kitang “modumot” bisan gani sa mga tawo nga giisip natong mahinungdanon kaayo alang kanato. Diha sa konteksto sa Balaang Kasulatan ang pagdumot nagpasabot man og loving less nga sa ato pa, gihigugma gihapon nato ang mga tawo nga nahimong mahinungdanong kabahin sa atong kinabuhi apan mas atong gihatagan og igong gibug-aton ang kamandoan sa atong magtutudlo. Ang misyon ni Kristo Jesus maoy atong priority bisan unsa pa man ang atong kahimtang sa kinabuhi.

Kasinatian

Ang unang pagbasa nihulagway sa kang Eliseo nga kahimtang. Tinuod diha sa iyang pagbuhat sa kabubut-on sa Dios ug sa kahagip-ot sa iyang kinabuhi dunay mga tawo nga nibati sa iyang panginahanglan. Ug ang maong akto sa kaayo nga gipakita sa magtiayon diin siya maghapitan, nabaslan og gasa. Ang gasa sa usa ka anak. Nga sa ato pa diay, diha sa atong pagsunod sa mga tunob ni Jesu-Kristo dunay gasa nga pagadawaton. Dili tungod kay angayan kita niini, kondili tungod kay ang atong Ginoo sayud man sa atong panginahanglan. Iyang ihatag kanato kun unsay giisip niyang makaayo alang kanato. Deus Providet kunGod will Provide matud pa nila.

Lihok

Diha sa atong katilingbang Kristohanon, atong anaron ang atong kaugalingon nga mosalig nga ang Dios mogiya ug modasig kanato sa pagbuhat sa iyang kabubut-on. ang mga programa sa atong tagsa tagsa ka mga Parokya, organisasyon ug kahugpongan kinahanglang nakasentro gyud sa programa nga iya ni Kristo Jesus ug kini ang pagpahari sa Dios dinhi sa atong kinabuhi ingon man sa atong katilingban.

Dugang pa, atong ipakita ang atong suporta kanila nga nanlimbasog sa paghimo sa lihok sa pag-ebanghelyo. Ang pagdasig kanila. Lakip usab niini ang abag financial. Kini tungod kay ang mamumuo angayan man usab nga hatagan tungod sa husto niya nga buhat.

Pangamuyo

Tanan: O Ginoo, sayud ka sa akong kahuyang ug kakulangan sa kinabuhi. Apan bisan pa man niini imo gihapon akong gihatagan og kahigayonan aron mosunod kanimo diha sa kinabuhi sa pagpangalagad. Unta kining maong kahigayonan dili mausik gumikan sa mga kabalaka.

Hinaut nga ang bisan unsang mga maayong mga buhat nga imong nasugdan pinaagi Kanako nga imong ubos nga alagad mahatagan og katumanan gumikan sa imong grasya. Kanimo akong gihalad ang tanan, ikaw nga buhi ug hari hangtud sa kahangturan. Amen