EDITORYAL — LGUs kuwang og aksyon vs baha

Pagkapait gyud sa sitwasyon sa mga kaigsuonan natong naa namuyo sa mga lupa o mga ubos kaayong bahin kay mao pirme mahan-okan sa tubig baha matag moulan.

Ang nakapait pa gyud ani, bisan og dili bagyo, molapaw naman ang tubig ug mosulod na sa ilang mga balay. Nahitabo ni dili palang dugay diha sa usa ka sitio sa Barangay Mabolo sa Cebu City ning semanaha sa dihang kalit nga nibundak ang ulan.

Tinuod walay makakontrol aning ulan, kung mobundak bisan unsang orasa ug kun unsa ka kusog ug kung asa nga lugar.

Pero dili ni rason para magpadayun ang pag-antos sa atong mga kababayan aning pagbaha nga nakahasol nila, nakapagastos nila pirme sa pagpaayo sa ilang mga balay ug mga gamit ug daghan pa.

Naa pay dalang hulga sa panglawas ang baha tungod sa kahugaw na sa tubig nga manulod sa ilang mga panimalay. Kahasol para sa mga manarbaho ug mangieskuylang mga kabataan.

Naay gilusad nga Oplan Kontra Baha ang nasudnong kagamhanan nga diin ubay-ubay nga mga departamento ug ahensiya sa gobiyerno apil ang mga pribadong kompanya nga nihimo og mga pamaagi para maundang ni ning problemaha.

Apan tungod sa kalapad sa nasud ug sa kadaghan sa mga lugar nga nagproblema aning baha tungod sa pagpasagad sa mga nangaging mga administrasyon, dili maapupa dayun sa kasamtang administrasyon ang pagpatarong ani.

Busa, responsibilidad gyud unta sa mga lokal nga kagamhanan ang pagpangita og paagi para matabangan ang ilang mga konstituwente ug dili tanan isalig lang o magpaabot sa nasudnong kagamhanan para maoy mangulo.

Tinuod naay mga gihimo ang mga LGUs kontra baha, pero pagkatinuod lang walay klaro ang direksyon. Walay kahumanan kay pirme lang gasugod ug walay nahuman.

Niadtong nibisita si Presidente Ferdinand Marcos Jr. sa Cebu human sa bagyong Tino, gimando niiya ang paghimo og mga proyektong pangkontra sa baha samtang padayun ang imbestigasyon sa mga anomaly sa flood control projects nga iyang nadiskubrehan.

Subo lang nga mura og paspas paman ang dagan sa suso kun itandi sa lihok sa mga lokal nga ahensiya ug departamentong gitahasan sa presidente pagtarong anang mga kasapaan, mga kanal ug ubang agianan sa tubig.