Ginamit ang Sentido Komon

Mt. 25;1-13

Sugilanon kini sa mga napulo ka mga dalaga. May mga suga sila kang kansang siga nag-agad sa lana.

Gitataw nga ang lima kanila maalamon mao nga nakapangandam og reserba. Samtang ang uban danghag mao nga wala makadala og reserba.

Kaniadto kun motambong kita og kombira sa kasal usahay madugay ug molanat kini hangtud sa kaadlawon.

Busa kinahanglang andam kita sa kanunay mao ngakinahanglanon kaayo nga dunay reserba nga lana aron pabiling magsiga ang mga suga.

Dili lang kini mahitungod sa pagpangandam og reserba kondili mahitungod kin isa tinud-anay nga kahulogan sa pagpulaw.

Ang pagpulaw nagpasabot man og kaigmat. Ang pagpulaw nagpasabot man og kaandam sa kanunay.

Ang pagbalik sa Ginoo sa ikaduhang higayon ang wala nato hisayri.

Mahimong moabot Siya sa paagi nga wala nato damha ug paabota. Busa kinahanglang andam kita sa kanunay.

Magpabiling magsiga unta ang atong mga suga sa mga maayong buhat. Pabiling magmata unta ang atong mga tanlag aron madasig sa paghimo og maayo bisan pa man diha sa tanang mga adlaw sa atong kinabuhi ug bisan gani diha sa mga takna sa atong pag-inusara.

Dili lang kinimahitungod sa pagtuman sa balaod kondili mahitungod usab kini sa paggamit sa atong sentido komon aron mamahimong mas praktikal ug makatarunganon ug may igong bunga ang atong pagsunod sa Ginoo.

Dili lang kini sa pagpangangkon nga kita iyang mga anak kondili atong gipakita gyud diha sa atong mga buhat.