Balik-eskwela

Milyun-milyong estudyante sa buong bansa ang magbabalik sa kani-kanilang paaralan ngayong araw. Muling haharap ang kabataan sa hamon ng pag-aaral. Masayang babalik ang mga bata sa kanilang mga kaibigan, guro, at bagong kaalaman. Kaakibat naman nito ang tanong na… sapat ba ang ating paghahanda?

Ang balik-eskwela ay paalala ng paulit-ulit na suliranin sa sistema ng edukasyon gaya ng kakulangan sa pasilidad. Maraming paaralan ang nananatiling siksikan, kulang sa upuan, at walang maayos na bentilasyon. Bagama’t ang mga guro ang haligi ng edukasyon, madalas silang kulang sa suporta, mababa ang sahod, at sobra ang trabaho.

Para sa mga magulang, dagdag pasanin ang gastusin sa pamasahe, baon, at gamit pang-eskwela, lalo na sa gitna ng mataas na presyo ng bilihin. Sa mga mag-aaral, bukod sa akademikong hamon, dala rin nila ang bigat ng kahirapan, kakulangan sa nutrisyon, at minsan ay kawalan ng motibasyon.

Sa kabila ng mga reporma at pangako ng pamahalaan, nananatiling hamon ang pagbibigay ng de-kalidad na edukasyon. Ang balik-eskwela ay hindi dapat maging taunang paalala ng kakulangan, kundi pagkakataon upang ipakita ang tunay na malasakit sa kabataan.

Ang pagbabalik-eskwela ay higit pa sa pagbubukas ng klase. Ito ay panawagan sa pamahalaan, guro, magulang, at komunidad na magtulungan upang matiyak na ang bawat bata ay may pantay na pagkakataon sa edukasyon. Kung nais natin ang mas maliwanag na kinabukasan, dapat nating tiyakin na ang bawat pasukan ay hakbang tungo sa pagbabago.