Modus sa Karsada gamit ang Sabon

Nasaksihan gyud mismo ni Cebu City Mayor Nestor Archival ang binuhatan niining usa ka grupo nga mamara og mga sakyanan ubos sa pasangil nga manghatag og sabon panglaba.

Apan ang tinuod, usa diay kini ka dako nga pagpangilad aron mabiktima ang mga lumalabay sa ilang modus.

Ang ilang estilo: parahon ang mga motorista nga daw nagpahigayon og checkpoint, unya sulsolan og mga binutbot nga estorya aron pugson pagpakuha sa ilang produkto.

Kon motubay ang biktima, dinhi na nila korneron—mangayo og ID, mamarenti nga kesho paryente o ig-agaw, ug kon madala sa ilang bulatik, aw, matik nga makakuot gyud og dakong kantidad aron ibayad sa sabon nga dili man lang gani mobuwa.

Gipangbadlong na sila ni Mayor Nestor apan gipahongwian lang sa pikas dunggan. Bisan si Raquel Arce, ang pangulo sa Cebu City Transportation Office (CCTO), mibadlong na usab kanila apan nagpahi bungol gihapon ang maong grupo.

Tungod sa ilang kagahi ug pamasig, natapos ra gyud ang ilang salida sa dihang gipangdakop sila sa kapolisan ug gipaubos na karon sa seryosong investigasyon.

Dili basta-basta kining grupoha kay duna silay kaugalingong sakyanan nga makalingla sa publiko nga mora sila'g naghimo og lehitimong promotional activity. Ang pangutana karon: kinsa man gyud ang nagpaluyo niini nga wala man silay kahadlok nga mamiktima taliwala sa adlawng dako?

Dugay na kining gireklamo sa katawhan kay nakaabot na kini sa nagkadaiyang dapit, ug ang tanang kasinatian pulos gyud pagpangilad.

Angay lang daygon nga nangunay gyud ang mayor sa Sugbo sa pagsanta niini, apan mas maayo unta kon magkahiusa ang ubang mga Local Government Units (LGUs) sa pagtangtang sa maskara niining grupoha nga lantaran ang pagpangilad.

Samtang duna silay produkto nga gidaladala iisip tabon sa ilang "negosyo," angay lamang nga mosulod na niining isyuha ang Department of Trade and Industry (DTI) ug uban pang ahensiya sa kagamhanan aron susihon kon duna ba silay saktong permiso.

Ang tinuod, ang una nga gihimo nga pagbadlong kanila usa ka huyang nga aksiyon.

Ang pag-abog o pagsaway lamang dili paigo sa mga grupong bagag nawong ug walay lipudlipod kon mangwarta.

Ang gikinahanglan dinhi mao ang "kamot nga puthaw"—lig-on nga disiplina ug saktong legal nga lakang aron motagam ug hingpit nga mohunong sa ilang pagpamiktima.

Alang sa publiko, magpabilin kitang mabinantayon.  Hinumduman nato kanunay ang bulawanong pahinumdom: ayaw pakig-estorya o pagpatubay sa mga estranghero sa dalan aron dili masulod sa bulsa.

Kining mga tawhana nga tapulan manarbaho og patas ug gusto lang mangwarta sa daling pamaagi, mas maayong "labhan" sa mga kaso ug silotan sa hustisya aron makatubag sa ilang binuhatan ngadto sa hukmanan.