Daw mga Karnero nga walay magbalantay

Mt. 9;32-38

Anaa sa kasingkasing sa atong Ginoo ang tumang kalooy ngadto sa katawhan. Alang kaniya, daw mga karnero sila walay magbalantay. Mga makaluluoy. Gikan ning maong kahimtang nahimugso ang kamandoan: “Pag-ampo kamo sa tag-iya sa Anihon aron magpadala siya og dugang mga mamumuo nga moani niini. Unsay buot ipasabot niini?

1. Kaniadto ug karon mas daghan ang anihon kaysa mga mangagani basta kinahanglanon gyud ang pag-ampo.

2. Ang atong Ginoo mao man ang maayong Magbalantay. Unta ang mga mamumuo mahisama unta kaniya ug sa iyang kasingkasing.

3. Ang gikinahanglan nato dili lang mahitungod sa gidaghanon kondili sa kalidad usab. Mga misyonero, kaparian ug relihiyoso nga mga malahutayon ug dili malumos sa bul-og sa kalibutanong awhag.

4. Ang pag-ampo alang sa bokasyon katungdanan natong tanan isip mga binunyagan. Dili lang unta kutob pud sa pag-ampo kondili sa pagsuporta kanila nga nagmanggihatagon sa ilang kaugalingon alang sa parasan sa Ginoo.

5. Alang sa mga kaparian, mga relihiyoso ug mga relihiyosa dili maayo nga usikan ang kahigayonan nga gihatag sa Ginoo aron makapangalagad. Himoa kini nga kahigayonan sa pagpasalamat. Mahimong kapoyon apan dili mahimong mo surrender! Laban alang sa kaluwasan sa mga kalag!