Binuang budget ni Marcos
Kon tarung ang budget nga gisumiter ni Presidente Ferdinand Marcos Jr. ngadto sa House of Representatives, nganong gipanalipdan man sa Malakanyang ang pagbugal-bugal na sab sa mga kongresista sa iyang gipangayo nga P7.2 trilyones para sa 2027?
Imbes ma-insulto nga gilaslasan ang budget sa mga proyekto nga giisip sa administrasyon nga importante ug dinalian, nganong giduphan man niyang pagsukip sa mga kongresista og kapin 7,000 ka mga proyekto nga balor og P190 bilyones nga abundang mga timaan nga, sama sa flood control projects, gamiton na sab sa pangurakot?
* * *
Ang proposed budget ni BBM naglakip sa P400 milyones nga infrastructure projects sa unang distrito sa iyang probinsiya sa Ilocos Norte. Sa ilang giaprobahan nga budget, gipaburot sa mga kongresista ang gahin sa distrito ngadto sa P4.8 bilyones.
Ang budget sa Malakanyang, gusto natong tuohan, nisubay sa proseso. Nanukad sa local developments councils ug gisubli sa mga sakop sa gabinete. Nganong nipakpak man ang presidente nga gisapawan lang sa lista sa mga kongresista? Tungod ba kay ang mabuhong nga kongresista sa distrito maong iyang anak nga si Sandro?
* * *
Laing binuang sa House (nga gihangop sa Malakanyang):
Sobra pa sa gidoble nila ang budget sa pagtukod og multi-purpose building gikan sa gisugyot ni BBM nga P41 bilyones ngadto na sa ?83.7 bilyones; pero
Gilaslasan nila ang budget sa pagtukod ug pag-ayo sa classrooms gikan sa gisugyot ni BBM nga P35.8 bilyones ngadto na lang sa ?31.8 bilyones ug gilansang ang budget sa health facilities sa ?10.1 bilyones.
* * *
Niay mga timaan nga nagkonsabo ang Malakanyang ug ang House sa pagpaburot sa mga ayuda (nga magamit sa pagsugod na sa kampanya sa eleksiyon sa 2028) ug paglaslas sa budget sa mga programa nga direktang mapahimuslan sa katawhan (dili na magpakiluoy sa mga politiko):
Gilaslasan og P170 bilyones ang budget sa Philippine Health Insurance Corporation (PhilHealth), gihimong P74 bilyones bisan nagkinahanglan og P244 bilyones; pero
Gipaburot ang mga budget sa MAIFIP (gikan sa ?24 bilyones ngadto sa ?52 bilyones), AICS (gikan sa ?33.29 bilyones ngadto sa ?59.09 bilyones), ug TUPAD (gikan sa ?11 bilyones ngadto sa ?16 bilyones).
* * *
- Latest
