Kinsa ang nakapuntos sa unang Sultada?

Nakasugod na gyud niadtong adlaw'ng Lunes, Hulyo 6, 2026, ang impeachment trial batok ni Bise Presidente Sara Duterte. Nagpakita dayon sa ilang labok ang prosecution ug ang depensa.

Sa wala pa gani sila pahimoa sa ilang opening statement, nagkatinubagay na dayon si Prosecution Lead Prosecutor Gerville Luistro ug Defense Lead Counsel Sheila Sison.

Kini human gitinguha ni Luistro nga ma-arraign si VP Sara, apan gisupalpal dayon kini ni Sison, ug sa kataposan gi-deny sa Impeachment Court ang motion sa prosecution.

Patilaw pa lang kadto ug pagpakita sa katakos sa duha ka habig—unang sultada pa lang, ug taas-taas pa kaayo ang atong atangan niining drama sa Senado, sa tinuod lang.

Kon imong tan-awon, gubat kini sa emosyon batok sa pamaagi sa balaod (law procedure).

Si Rep. Gerville Luistro daling nikuha sa atensiyon sa publiko pinaagi sa iyang emosyonal ug madasigon nga opening statement.

Gidala niya ang hisgotanan ngadto sa lebel sa ordinaryong Pilipino. Matud pa niya, dili kini estorya lang sa politika, kondili estorya sa kuwarta ug pagsalig sa katawhan—ang giingong gikawkaw nga pundo sa selyo sa gobiyerno.

Maayo pagkahan-ay ang iyang pagkumpara nga kon ang usa ka ordinaryong empleyado o mamumuo masilotan man gani kon adunay selyo o pundo nga mawala, nganong dili man ang labing gamhanan sa nasud?

Pinaagi sa iyang linya nga, "Evidence, hindi chismis, hindi haka-haka, hindi propaganda, at lalong hindi soc-med narrative," gipasalig niya nga ang prosekusyon mosalig sa kamatuoran ug mga dokumento sa korte, dili sa saba sa social media.

Klaro nga ang iyang tumong dili lang ang pagbistado ngadto sa mga maghuhukom (mga Senador), kondili ang pagkuha usab sa kasingkasing ug simpatiya sa tibuok nasud.

Sa pikas bahin, si Atty. Sheila Sison nipakita og bugnaw, kalkulado, ug estrikto nga depensa. Wala siya mosunod sa emosyonal nga dula ni Luistro. Imbes nga motubag sa mga pasangil sa personal nga lebel, iyang gipahinumdoman ang Senado nga kini usa ka "constitutional court" ug dili usa ka tiange sa politika.

Gipakita ni Sison ang iyang kaisog sa dihang iyang gigamit ang desisyon sa Korte Suprema niadtong miaging tuig nga nag-ingon nga ang nangaging lakang sa impeachment "tainted with grave abuse of discretion."

Iyang gipahinumdoman ang tanan nga ang iyang kliyente gibotohan sa kapin 32 ka milyon nga mga Pilipino, ug ang pagtangtang kaniya usa ka seryosong butang nga supak sa kabubut-on sa lungsod kon dili moagi sa saktong hustisya.

Ang iyang hugot nga baruganan: Ang "burden of proof" o ang obligasyon sa pagmatuod naa sa nag-akusar. Ug samtang wala pa kana mapamatud-an, ang bise presidente pabilin nga inosente.

Ang gipakitang awra ni Atty. Sison hilom apan daw makapanglimbawot sa balhibo; ang kada pulong nga molugwa sa iyang baba makapahilo sa iyang kontra gamit ang balaod.

Wala gani kini nagpakita og kakulba ug bisan gamay nga pagka-intimidate sa iyang kontra.

Daghan pa kita og masaksihan sa mosunod nga panid niining nagkakulba-hinam nga politikal nga drama. Tinuod, usa kini ka pasundayag sa politika nga adunay nagdirehir kon asa kini mosangpot. Unta mogawas ang kamatuoran niining tanan—kini ang atong atangan.