Pakauwaw nga pagpataka
Kon tinuod ang sulti ni Senate President Sherwin Gatchalian nga siyay niawhag sa majority bloc sa pagpili ni Senador Chiz Escudero isip presiding officer sa impeachment trial ni Bise Presidente Sara Duterte, gi-sekreto nila ang plano. Bisan pa sa pagbisto ni Senador Ping Lacson sa bag-ong trabaho ni Escudero.
Si Escudero nibalibad nga huhungihong ra ang kasayuran ni Lacson. Si Gatchalian nibalikbalik og pahibawo nga siya ang presiding officer ug hagbay ra siyang nangandam. Tak-om ang ilang kaubanan. Pero napamatud-an sa pagsugod sa husay niadtong Lunes nga sakto si Lacson.
* * *
Tingali nahibawo na sa plano, si Senate Minority Leader Alan Peter Cayetano (nga klarong wala pang makadawat nga 28 ka adlaw rang iyang Senate presidency) ni-utingkay sa journal sa Constitutional Commission nga nipanday sa 1987 Constitution.
Iyang gibasa ang binayloay og mensahe nilang kanhi Chief Justice Hilario Davide Jr. ug kanhi Comelec Chairperson Christian Monsod, pulos mga sakop sa komisyon. Nga gihubad ni Cayetano nga nagpasabot nga ang Senate president ra ug wala nay lain ang maka-preside sa husay sa bise presidente ug ubang impeachable officials gawas sa presidente.
* * *
Bisan walay nangutana, nipahibawo si Cayetano nga gradwado siya sa Ateneo de Manila School of Law. Aron pag-insistir nga lapad ang ilang kasuhito sa balaod, gitawag sang iyang maguwang, Senador Pia Cayetano, nga gradwado sa University of the Philippines College of Law.
Nahilaw hinuon ang managsuon dihang sa wala pang kabuylo pagpaburot sa ilang pagsabot sa panagsulti nilang Davide ug Monsod nibarug si Senador Kiko Pangilinan aron pagpahibawo nga walay probisyon sa konstitusyon nga nagsugo nga senate president ray maka-preside.
* * *
Angay'ng magpasalamat ang managsuong Cayetano nga wala katambong sa pagsugod sa husay silang Davide ug Monsod. Kay mas mauwawan pa gyod unta sa ilang pataka.
Human nakadungog sa husay, si Monsod nitug-an sa beteranang peryodista nga si Raissa Robles nga sakto si Pangilinan. Gani, nipasabot si Monsod, makahimo si Gatchalian sa pagtudlo ni Escudero o ni bisan kinsang senator judge sa pag-preside sa impeachment trial. Matod ni Monsod wala kinahanglana ang botasyon nga niresulta sa pagkapili ni Escudero, 12-8. Naneguro lang ang mayoriya, nangagpas si Monsod, aron dili makapangita og buslot ang managsuong Cayetano.
* * *
- Latest
