EDITORYAL — Politiko vs Statesman

Nag-walkout ang mga senador sa minority bloc sa Senado niadtong miaging gabii tungod sa mosyon nga wala nila mauyoni, kini ang mosyon nga giisa ni Senador Rodante Marcoleta nga usbon ang kasamtang Senate Rules sa impeachment.

Kung simple lang kadto nga mosyon, posibleng matugotan kadto ug dili mo walkout ang mga kaubanan nilang senador sa minoriya.

Ang mosyon man gud ni Marcoleta, tugotan nga makatambong sa impeachment hearing ni BIse Presidente Sara Duterte gihapon bisan og ipaagi sa remote o online ang mga wala diha pisikal nga nitambong nga mga senador.

Usa na niini si Senador Ronald “Bato” Dela Rosa nga wanted na karon tungod sa warrant of arrest gikan sa International Criminal Court may kalabotan sa crimes against humanity nga diin usa siya sa gikonsiderar nga co-conspirator ni kanhi presidente Rodrigo Duterte nga natanggong karon sa The Hague. Sa pagkakaron ang minoriya naay 11 ka senador ug 13 sa mayoriya, pero nakuhaan na ni karon og usa nga si Dela Rosa, ug duna pay laing senador sa mayoriya nga gikatakdang arestuhon tungod sa ilang mga kaso may kalambigitan anomaly sa flood control projects.

Tungod ani, nagduda si Senador Erwin Tulfo nga kining mosyon gituyo ni para makatambong sa mga sesyon ilabi na sa impeachment hearing ni VP Duterte ug makabotar gihapon ang mga senador bisag dili sila pisikal nga makatambong.

Kung ang mga tawo gani giantos ang paglinya sa gawas sa mga voting precincts para botaran ning mga senador, unya sila mobotar lang pinaagi sa online? 

Naabot pa sa punto nga si Marcoleta nihisgot og “bellow the belt” nga mga pamulong, nga maong wala kasabot ang iyang mga kaubang senador kay dili daw sila mga abogado. Butang nga nisamot og kainsulto ang iyang mga kauban.

Dili raba tanang senador pulos mga abogado. Ang mga abogadong senador karon mao silang Senate President Alan Peter Cayetano,  Senador Francis "Chiz" Escudero, Senador Pia Cayetano,  Senador Francis "Kiko" Pangilinan, ug si Marcoleta.

Ang pangutana kinahanglan ba gyud nga usa ka abogado ang usa ka magbabalaod? O usa ka Statesman nga dili basta lang politiko, kondili naa gyuy integridad, kaalam ug mas prayoridad ang kaayohan sa kinabag-an ug dili sa ilang partido o kaalyado.