EDITORYAL - Bayolenteng contents

Makaalarma na kaayo ning mga bayolenteng krimen nga nanghitabo karon sa pipila ka mga public schools sa Pilipinas. Kagahapon, tulo ka estudyante ang nakalas ug pito ang nasamdan sa nahitabong pagpamusil sa sulod mismo sa eskuylahan didto sa Tacloban City.

Ang mga suspek parehong menor de edad ug estudyante sa eskuylahan, ang mga biktima mga estudyante sab. Tubag ni sa laing insidente sa sud sa gihapon sa eskuylahan sa Cavite niadtong adlaw nga Biyernes sa dihang usa ka estudyante sab ang gidunggab sa laing estudyante.

Pipila ka adlaw na ang nakalabay sa wala pa mahitabo ang pagpanunggab diha sa Cavite, naa say pito ka babayeng estudyante sa usa ka pribadong eskuylahan diha General Trias City, Cavite gihapon ang gidunggab sa laing babayeng estudyante.

Ang ingon sa kapolisan, kaning mga hitabo naglambigit sa bullying. Kaniadto pa ning problemaha sa nagkalain-laing mga eskuylahan dili lang dinhi sa Pilipinas, apan ning bag-o, nagkadaghan na ang mga insidente sa pagpanimalos sa mga nabiktima sa bullying.

Kining nahitabo sad sa Tacloban City, ikaduha na ni nga natalang kaso pagpamusil og estudyante sa lain sab nga estudyante. Niadtong 2025, usa ka babayeng estudyante sad ang gipusil sa iyang classmate diha sulod sa ilang lawak-saringan, namatay ang biktima.

Nikusog ang panawagan gikan sa Department of Education sa tanang mga eskuylahan nga pahugtan og maayo ang pag-inspeksyon sa mga gidala sa mga estudyante ug bantayan ang mga kalihokan sa ilang mga estudyante.

Pero, dili lang dapat ang seguridad sa eskuylahan ang angay aksyonan, ang Kongreso dapat mohimo og balaud nga magdili o ba kaha mo-regulate batok aning mga bayolenteng online games ug social media sa mga menor de edad dinhi sa nasud.

Tungod kay dunay mga online games, social media posts, ug websites nga mga bayolente ang contents nga expose kaayo ang kabataan.

Dili tanang oras mabantayan para makapasabot sa mga bata kun unsa na ilang mga nakita o natan-aw. Naay ubang ginikanan, wala magpakabana.

Ang pag ban ani sa nasud maoy pinakadali nga paagi aron malikay ang mga kabataan sa dili maayong impluwensiya, labaw sa tanan dili ni makadaut sa kabataan ug sa ilang kaugmaon.