Ang pagduaw ni San Padre Pio

Salamat ni Padre Romeo “Dodong” Desuyo kay iya gyud nga gihatud ang pilgrim image ug relic ni San Padre Pio. Kini ang paagi nga akong gisaulog ang duha ka mga dekada sa pagpangalagad.

Si Padre Pio usa ka yanong Capuchin Franciscan. Gani, iyang gusto nga buhaton mao lamang ang pag-ampo. Kini tungod kay He is just a friar who wanted to pray. Giisip usab siya nga Stigmatist tungod kay iya mang nadawat ang mga samad sa atong gilansang nga Ginoo sama sa nadawat sa seraphic father nga si San Francisco. Iya kining giantos sulod sa 50 ka mga tuig! Ug kining maong pag-antos iyang gihangop uban ang gugma ug pagpaubos.

Malisang ang mga demonyo kang Padre Pio ug daghang mga tawo ang natabangan niya gikan sa maong mga alantuson. Busa, akong ipaambit ang deliverance prayer sa pangaliya ni San Padre Pio:

Mga pag-ampo sa kalingkawasan ni San Padre Pio

Manguros

Nagatuo ako, Amahan Namo, Maghimaya ka Maria (3x) Himaya sa Amahan Akto sa Paghinulsol

Pag-ampo ngadto kang San Miguel Arkanghel

San Miguel Arkanghel panalipdi kami sa gubat, mahimo kang taming batok sa mga dautan ug sa tanang lit-ag sa yawa. Gapuson unta siya sa Ginoo pinaagi sa Diosnong gahom itambog sa impiyerno si Satans ug ang tanang dautang Espiritu nga naglibot-libot sa yuta nangita sa kapildihan sa mga kalag. Amen.

Memorare

Hinumdoman Mo o labing Bulahang Birhen Maria

Nga sukad masukad wala igdungog

Nga si bisan kinsa ang nidangop sa imong panalipod ug nihangyo sa imong panabang ang napakyas.

Dinasig ning maong pagsalig , nangadangop ako kanimo O Ulay sa tanang mga ulay, akong inahan

Sa imong atubangan nagabarog, makasasala ug masulob-on

O Inahan sa Pulong nga Nagpakatawo

Yam-iri ayaw ang akong mga pangamuyo apan diha sa imong kalooy, intawon dungga ako. Amen.

Pagsalikway kang Satanas ug ang pag-angkon sa hingpit nga kadaugan

Giangkon ko ang hingpit nga kadaugan sa Krus ni Jesu-Kristo akong Ginoo. Nilangkatan sa mga hinagiban ang tanang kagahuman ug kagamhanan. Iya silang gipaulawan ug nagmadaugon siya atubangan sa kadaghanan pinaagi sa Krus (cf. Col. 2;15). Ang iyang kadaugan akong kadaugan. Sa Ngalan ni Ginoong Jesu-Kristo, gisalikway ko ang tanang matang sa binuhatan ni Satanas dinhi sa akong kinabuhi, sa tanang bayhon niini nga mahimong akong nakasulod sa akong kinabuhi pinaagi kanako ug sa ubang mga tawo. Giguba ko ang tanang sukaranan, mga tunglo, yamyam, ug mga katungod nga nahuptan ni Satanas sa akong kinabuhi nga mahimong nakasulod sa akong kinabuhi pinaagi sa akong binuhatan ug sa uban. Linig-on sa mga pangaliya sa Putli nga Birhen Maria, inahan sa Dios ug ni San Miguel Arkanghel ug sa mga apostoles Pedro ug Pablo ug sa tanang mga Angheles ug mga Santos sa langit, ginamhan sa Balaan ug Gamhanang Ngalan ni Jesu-Kristo. Nangamuyo ako kanimo O Dios nga imong pagamandoan si Satanas ingon man ang iyang mga hinanib ug kun si kinsa man sila, nga mopahawa ug mopalayo gikan sa akong kinabuhi. Akong bawion ang akong katungod ug sukaranan nga nasakmit ni Satanas gikan sa akong kinabuhi pinaagi sa akong mga sala. Akong gibawi kining maong katungod ug sukaranan alang kang Kristo Jesus. Siya lamang maoy nanag-iya kanako. Amen.

Pag-Ampo sa Kalingkawasan ni Tertulian

Pangulo: Sa Ngalan ni Ginoong Jesu Kristo pahawa Satanas! Palayo kamo kanamo kamong mga dautang mga Espiritu sa garbo, kasuko, kasina, kalaog, kataspok, kaulag ug kahakog. Ayaw kami samoka! Kay kami gilukat sa Balaang Dugo sa among Ginoong Jesu- Kristo. Tubag: Amen

Pangulo: Sa ngalan sa bulahang Birhen Maria nga nipigsat sa ulo sa bitin nga mao ang yawa, pahawa kamo mga dautang Espiritu bunga sa tunglo, yamyam, ug buyag, ug sa bisan unsang matang sa Mahika (nganli ang mga posibleng tinubdan). Ayaw samoka bisan kinsa kanamo sukad karong adlawa  sanglit ang asul nga kupo sa Mahal nga Birhen nagatabon man kanamo.

Tanan: Amen

Sa Ngalan sa Espiritu Santo tinubdan sa balaanong kinbuhi, pahawa kamo mga dautang Espiritu sa pagdumili sa pagpasaylo, sa pagdumili sa paghinulsol, sa kawalay kadasig ug paglaum. Sa espritu sa hikog. Ayaw na kami samoka, kami nga Templo sa Espiritu Santo.

Tanan: Amen N.B. Mahimong himoon ang pagbendita sa mga tawo o dapit human ning maong pag-ampo. Kuyog niini ang pag-awit sa himno sa Birhen Maria.