Putlon ang tinubdan

Ang pagkasakmit sa mobalor sa P138 milyones nga shabu sa dakbayan sa Naga ning lalawigan sa Cebu dili pa lamang dugay nagpakita lamang sa padayong operasyon sa ilegal nga druga sa probinsiya.

Bisan pa sa gipalapdang kampanya ug operasyon sa kapulisan ug Philippine Drug Enforcement Agency, mora'g lisod gayud maputol ang negosyo sa ilegal nga druga dinhi sa probinsiya ug sa Pilipinas.

Dako ang kantidad  sa nasakmit nga shabu ug nagpasabot lamang kini sa  nagkadako nga merkado ug demand sa druga. Ug dili lamang kini. Halos matag adlaw adunay nadakpan nga mga nalambigit niini.

Ang Sugbo, isip sentro sa komersiyo sa Kabisayaan, nahimong kritikal nga agianan ug distribusyon sa shabu ug uban pang illegal nga druga.

Kini maoy nakapalig-on sa atong mga pagduda nga ang mga sindikato klaro nga adunay lig-on nga koneksiyon ug mekanismo sa ilang negosyo.

Mao nang mas angay pahugtan ang intelligence gathering sa otoridad. Kinahanglan nga mas palawman pa ang ilang pag-monitor sa mga sindikato ug ilang koneksiyon sa gawas sa nasud.

Lakip sa pagpalig-on sa koordinasyon tali sa kapolisan, PDEA ug lokal nga mga opisyal ang pagpahugot usab sa siguridad sa mga bus terminal,  tugpahanan ug pantalan diin daghang druga ang makalusot.

Ang pagkasakmit sa P138 milyones nga shabu sa niaging adlaw usa ka dako nga kalamposan. Apan usa usab kini ka timaan nga dakong buhi ug lig-on pa ang drug trade sa Cebu ug sa nasud.

Ug usa ra ang solusyon niining problema sa naghitak nga operasyon sa ilegal nga druga sa Sugbo ug nasud. Kini mao ang mas agresibo ug lawom nga aksiyon sa otoridad pagputol sa tinubdan niini.