Lugway ni Remulla
11 ka adlaw na lang ang nahibilin sa lugway nga gihatag ni Ombudsman Boying Remulla sa iyang opisina sa pagpasaka og mga kasong plunder ug money laundering silang kanhi House Speaker Martin Romualdez ug kanhi Senate President Chiz Escudero nga pulos gilambigit sa flood control scandal.
Kon matuman mahimong mapriso na karong buwana ang duha sa labing dagkong isda sa gihulagway nga labing grabeng kinawatay sa kasaysayan. Kapamatud-an ni Remulla nga dili siya kutob ra sa istorya. Nga duna duna diay siyay igong katakos ug kaisog pagtuman sa iyang trabaho.
* * *
Kon walay makiha ug walay mapriso karong buwana, masumpayan ang nagkataas nang lista sa napakyas nga mga pagarpar nilang Remulla ug sa administrasyon ni Presidente Ferdinand Marcos Jr.:
Mapriso nang mga kongresista ug mga senador sa wala pay pasko sa niaging tuig; ug
Mapasakaan na og kaso ang mga kongresista, mga opisyal sa Department of Public Works and Highways ug mga kontraktor nga nikurakot sa substandard flood control projects sa Sugbo (nga apil sa gibasol sa pagkabanlas ug pagkamatay sa 150 ka mga biktima sa bagyong Tino niadtong Nobyembre).
* * *
Ambot dili ba maapektahan na sab ang nalangay nang mga kaso sa flood control scandal sa mas dinalian nga politikanhong mga interes sa administrasyon:
Napamatud-an ni Romualdez nga hingpit gihapon ang iyang pagkontrolar sa Lakas-CMD, ang labing dakong partido sa House nga nakahatag sa labing daghang boto sa impeachment ni Bise Presidente Sara Duterte; ug
Pagtumaw sa ngalan ni Escudero nga arang-arang alternatibo kay sa paturagas nga liderato ni Senate President Alan Peter Cayetano.
* * *
Hinaot nga dili gamiton ni Remulla nga rason sa paglangay una sa mga kaso nilang Romualdez ug Escudero ang mas init niyang imbestigasyon sa pagpamusil sa Senado sa niaging semana. Angay siyang mamalandong sa tambag ni Cebu Archbishop Abet Uy nga apil sa mga paagi nga kamenosan ang kalibog ug pagkabuak-buak sa nasud mao ang:
Pag-imbestigar ug pagsilot sa mga responsable sa tanang kawat bisan kinsa ang maigo; ug
Pagpadayon sa walay kalangay sa impeachment ni VP Sara pero dili sab kalimtan ang mas dakong kawat sa flood control projects nga naglambigit sa labing sinaligan nga mga opisyal sa administrasyon.
* * *
- Latest
