Kinabag-an ang matuman
Kon dunay mga higayon nga maluya na kay bisan sa atong pagpakabana wala mabadlong ang mga anomaliya ug wala masiloti ang mga kawatan, wala ka mag-inusara. Daghan nang nikuwestiyon sa ilang pagtampo sa pakigbisog pag-umol og mas maayong ugma para sa atong mga bata.
Pero ayaw pakawala og paglaom. Dunay mga timaan nga wala makawang ang pagpanginlabot sa publiko. Ang walay hunong nilang pag-awhag nga patubagon ang tanang nagpahimulos sa gahom nakadungan og apiki sa duha ka higanteng personalidad: Silang Bise Presidente Sara Duterte ug kanhi House Speaker Martin Romualdez.
* * *
Tan-awa unsay nahimo sa kusganong pagsaway sa katawhan sa pagyaka ni kanhi Senate President Chiz Escudero ug pagbasura sa Korte Suprema sa articles of impeachment batok ni VP Sara sa niaging tuig:
Nitumaw ang bag-ong liderato sa Senado nga determinadong nisugod ug motiwas sa impeachment trial karong tuiga (nga nihatag sab ni Escudero og kahigayonan pagpamawi sa iyang pakauwaw sa “forthwith”); ug
Wala manghilabot ang mga mahistrado bisan sa lab-as nga petisyon ni VP Sara pagpugong sa impeachment proceedings sa House Justice Committee ug sa nagpadayong husay sa Senado.
* * *
Tungod sa pag-insistir sa katawhan nga dili katuohan nga mga kongresista ray nag-piyesta sa kinawatay sa flood control projects ug walay labot ang liderato sa House:
Nilampos ang Ombudsman sa paghipos og mga ebidensiya ug pagpalig-on sa mga kaso batok ni Romualdez; ug
Nangisog ang Sandiganbayan pagbalhog ni Romualdez sa Quezon City Jail bisan sa iyang palusot uban sa pakigkonsabo sa mga doktor nga tandugon ang iyang panglawas ug kinahanglang papahuwayon sa ospital.
* * *
May sukaranan ang pagduda nga mopatigbabaw ang ka-espeso sa dugo sa panag-agaw ug tugotan ni Presidente Ferdinand Marcos Jr. nga mabasura ang mga kaso batok ni Romualdez sa Sandiganbayan ug makagawas siya sa prisohan. Dili sab masalikway ang posibilidad nga mouyon ang Malakanyang pag-absuwelto ni VP Sara sa mga kaso bugti sa pagsaad nga adto na lang magtikaw-tikaw sa Davao.
Walay makaseguro sa umaabot nilang mga maniobra. Bugtong garantiya mao nga kon magpadayon ang pagbantay sa katawhan dili makapatuyang ang kahakog sa mga nagtungtong sa gahom. Kay dili mosugot ang kinabag-an nga ang kangitngit modaog batok sa kahayag.
* * *
- Latest
