Sir Raymund Branzuela

Nasubo ako dako uyamot pagkasayod nga namatay diay si Sir Raymund Branzuela. Dugay naming nagkakuyog ni Sir Raymund.

Seminarista pa lang ko dunay mga kalihukan nga nagkakuyog kami.

Sa akong Cantamisa kaniadto usa pud siya nga nitabang og pahiluna sa tanan.

Ug niadtong na assign ko isip in charge sa mga lay ministers sa district 7 kaniadto, malipayong nibulig si Sir Raymund nga nipagamit sa COOP Building alang sa mga formation seminars kaniadto.

Aktibo pud siya sa simbahan sa mga nagkadaiyang mga organisasyon. Sa laktod mas daghan ang iyang out kaysa iyang in nga sa ato pa mas daghan ang iyang pangalagad sa uban kaysa iyang panahon alang sa iyang kaugalingon.

Sulod sa hataas nga panahon wala na gyud mi komunikasyon. Kini tungod kay na busy ko sa mga gimbuhaton sa mga nagkadaiyang mga Parokya diin ako nadestino.  Panagsa na lang mi nagkita gawas lamang sa mga higayon nga momisa ko didto sa Catmon panahon sa nobenaryo.

Bag-o lang ko nasayud nga nipanaw na diay si Sir Raymund Branzuela. Ang kinabuhi gyud nato dili hibaw-an mao nga dili gyud kita magpasagad sa atong lawas ug sa atong binuhatan.

Kausa ra kita moagi ning kalibotan busa kinahanglang magbilin kita og nindot nga handumanan ug legasiya dili tungod aron kita handumon kondili aron kita makapahimaya sa Dios nga atong magbubuhat. Pahullay sa kalinaw sir Raymund Branzuela.