Problema sa tubig

Ang mga lumolupyo sa Barangay Pit-os ug silingang mga barangay sa Cebu City buhong unta kaayo sa tubig sa wa pa makubsi sa Metro Cebu Water District ang gipalit nilang tubig gikan sa private water supplier nga nagkuha og tubig gikan sa Barangay Lusaran.

Niadtong panahon nga ang MCWD gidumala pa ni Atty. Jose Daluz III nga maoy chairman, ang MCWD mikontrata og 30,000 cubic meters (150 ka baril) nga tubig gikan sa JE Hydro & Bio-Energy Corporation, kada adlaw, nga isuplay diri sa reservoir sa MCWD sa Barangay Busay, ug Pit-os area.

Duha ka kontrata ang gipirmahan sa MCWD Board ug sa JE Hydro. Ang una mao ang pag-supply og 15,000 cubic meters nga tubig direkta sa Barangay Busay, ug paglabay sa mga usa ka tuig, gihimo ang laing kontrata alang sa dugang 15,000 cubic meters nga tubig para sa Pit-os.

Ang kontrata mao nga ang JE Hydro namohonan og P1.3 billion paghimo og planta ug pagbutang og mga dagkong linya sa tubig aron nga ang tubig sa Lusaran moabot sa Busay, ug masulbad ang problema sa tubig sa bukirang mga barangay.

Sa kontrata, dunay petsa nga gilatid nga maoy pagsugod og supply og tubig sa JE Hydro, ug gilatid sa kontrata nga kon mahitabo nga ang MCWD dili pa makadawat og tubig, magmulta sila og P1 million kada adlaw.

Nakahuman pagsayo ang JE Hydro sa ilang tahas, apan ang laing kontraktor sa MCWD nga nagkutay og mga linya gikan sa Busay paingon sa Lahug, pwerteng dugaya nakahuman ug nalangay og mga tulo ka buwan.

Ang JE Hydro mahimo gani unta nga modemanda nga bayran sila sa MCWD sa gilatid nga penalty, apan wa kini himoa sa JE Hydro. Tungod niini, nahukman sa MCWD Board nga dugangan lang og laing 15,000 ang paliton nilang tubig gikan sa JE Hydro, ug adto kini sa Pit-os area isuplay.

Apan pagbanos sa laing Board of Directors sa MCWD, gihimo na lang nga 15,000 cubic meters ang gikumpra nilang tubig gikan sa JE Hydro. Nangreklamo ang taga Pit-os ug Talamban, apil sa mireklamo si Konsehal Alvin Arcilla.

Mao nga gidugangan sa MCWD og 5,000 cubic meters, ug nahimo na nga 20,000 cubic meters (100,000 ka baril) kada adlaw ang gikumpra nila. Wa na tumana ang kontrata nga 30,000 cubic meters ang paliton sa MCWD kada adlaw.

Apan ang problema karon, kay ang MCWD wa man sab diay pa makabayad sa ilang obligasyon nga bayranan sa JR Hydro nga kapin na sa P100 million.

Naglibog ko kay ang mga konsumedor og tubig kon dili makabayad sa usa ka buwan, putlan man dayon sa MCWD og koneksiyon?