Ang Sirkus sa Senado

Dili malimod nga ang kalit nga pagkawala ni Senador Ronald "Bato" Dela Rosa gikan sa edipisyo sa Senado nagbilin og usa ka dakong tamparos sa nawong sa atong mga tinugyanan sa balaod. Atubangan sa maong hitabo, duha ka kamatuoran ang mikita: una, ang dako nga kahuyang sa atong sistema; ug ikaduha, ang lawom gihapon nga impluwensya sa kanhi hepe sa nasudnong kapulisan.

Makapangutana gyud ang ordinaryong lungsoranon—giunsa man pag-ikyas sa usa ka inilang personalidad taliwala sa gatusan ka mga sakop sa PNP, NBI, ug AFP nga nag-alirong sa sulod ug gawas sa Senado? Ang kapakyas sa pagbantay kaniya usa ka dakong timaan sa pagpasagad o, mas grabe pa, usa ka dako nga sabutsabot.

Lisod tuohan nga milusot lang si Dela Rosa nga daw aso kon wala pa kini tabangi sa iyang mga impluwensyal nga kauban sa Senado ug sa mismong sulod sa sirkulo sa mga awtoridad. Kini nga posibilidad dili angayng ibalewala ug kinahanglan nga imbestigahan.

Apan luyo niining tanan, mitungha usab ang laing pangutana: nganong nagpanuko man ang mga awtoridad sa pagpatuman sa warrant gikan sa International Criminal Court (ICC)? Matud pa sa pipila, nagpanuko ang mga otoriad tungod sa giduso nga Temporary Restraining Order (TRO) sa kampo ni Dela Rosa ngadto sa Korte Suprema, nga sa ulahi wala raman usab giuyonan.

Kanunay gihagit sa senador ang legalidad sa ICC ug miinsistir nga ang lokal nga korte ra ang adunay gahom kaniya tungod kay nibiya na ang Pilipinas sa ICC. Apan ang iyang pag-ikyas nagpakita ba sa iyang baroganan, o nagpakita ba kini sa kahadlok nga atubangon ang internasyonal nga hustisya?

Aron mosamot kalingaw ang sirkus, misalmot pa gyud si kanhi senador Antonio Trillanes IV nga mao pa gyud ang nagdala sa warrant ngadto sa sulod sa Senado. Dinhi kita makapangutana: unsa man ang legal nga kapasidad ni Trillanes sa pag-serve sa warrant? Dili siya sakop sa Interpol, ug labaw nga dili siya opisyal nga representante sa ICC.

Ang iyang pag-apil apil klaro nga dala sa personal nga dumot ug pamulitika batok kang Bato. Imbis nga hapsay nga proseso sa balaod, ang gihimo ni Trillanes nakadugang lang sa kagubot ug naghimo sa tibuok Senado nga daw usa ka dako nga salida sa telebisyon.

Kining nahitabo sa Senado usa ka dako ug makauulaw nga drama nga gitan-aw karon sa tibuok kalibotan. Nagpakita kini nga sa Pilipinas, ang balaod mahimo rang duwa duwaan, lutsan, ug ligsan kon ikaw adunay gahom ug koneksyon. Samtang nagpaabot kita sa sunod nga yugto niining maong drama usa ra ang sigurado—ang dako nga pildi niining tanan mao ang integridad sa atong hustisya.