VP Sara ‘di na matatakasan impeachment

Binasura kahapon ng Quezon City Regional Trial Court ang petisyon ni Atty. Mans Carpio na ipatigil ang impeach­ment laban sa asawa niyang si Vice President Sara Duterte. Sa desisyong ito, muling pinagtibay ng hukuman na ang kapangyarihan ng impeachment ay eksklusibong nasa Kamara at hindi maaaring pakialaman ng korte.

Sa limang pahinang resolusyon ni Judge Madonna Echiverri ng QC RTC Branch 81, malinaw na nakasaad: “The petition for prohibition is DISMISSED for lack of juris­diction.” Hindi pinakinggan ng korte ang hiling na pigilan ang subpoena ng Justice Committee sa mga tax records ni Carpio. Ang mensahe ay simple ngunit mabigat na ang impeachment ay isang political process, hindi judicial remedy.

Sa kasaysayan ng Pilipinas, tatlong impeachment com­plaints ang umabot sa trial: laban kay President Joseph Estrada (2000), Chief Justice Renato Corona (2011), at Chief Justice Maria Lourdes Sereno (2018).

Sa lahat ng ito, malinaw na ginamit ng Kongreso ang impeachment bilang sandata ng accountability, kahit pa puno ng pulitika ang proseso.

Sa huling survey ng Tangere (May 5-6 2026), 90% ng mga Pilipino ang naniniwalang dapat harapin ni VP Sara ang impeachment para malinawan ang mga alegasyon ng katiwalian at kapabayaan.

Sa puntong ito, lumilinaw na ang hudikatura ay hindi magiging kanlungan para sa mga nais takasan ang pananagutan sa Kongreso.

Kung ang impeachment ay tunay na mekanismo ng accountability, dapat itong ituloy nang walang hadlang. Ang hamon ngayon ay nasa Kamara. Paano nila gagamitin ang kapangyarihang ito para sa interes ng taumbayan, hindi ng pulitika?

Ang desisyon ng QC RTC ay paalala na walang shortcut sa pananagutan at ang transparency ay dapat manaig sa gitna ng political drama.