‘Trapik, tubig at presyo ng bilihin’

Hindi na biro ang sabay-sabay na krisis na kinakaharap ng mga Pilipino. Sa kalsada, sa palengke, at sa bawat bahay, ramdam ang bigat ng trapik, kakulangan sa tubig, at taas-presyo ng bilihin. Ang mga problemang ito ay hindi magka­kahiwalay kundi magkakabit, at sabay na bumabagsak sa balikat ng mamamayan.

Araw-araw, libo-libong motorista at pasahero ang naiipit sa matinding trapik sa mga pangunahing kalsada. Sa halip na maibsan, lalo pang lumalala dahil sa kulang na mass transport at hindi maayos na traffic management. Ang oras na dapat ay para sa pamilya o trabaho, nauubos sa kalsada.

Kasabay naman ng banta ng El Niño, maraming lugar sa Metro Manila ang nakakaranas ng water interruption. Ang mga residente ay napipilitang mag-ipon ng tubig sa timba at drum, habang ang mga ospital at paaralan ay nag-aalala kung paano magpapatuloy sa operasyon. Ang kakulangan sa tubig ay hindi lamang abala, ito ay panganib sa kalusugan.

Sa palengke, ramdam ang bigat ng presyo ng bigas, gulay, at kuryente. Ang dating P50 kada kilo ng bigas ay halos P70 na ngayon. Ang mga drayber at manggagawa ay humihiling ng dagdag na ayuda, habang ang mga pamilya ay nagtitipid ng pagkain para lang magkasya ang budget.

Kaya’t panawagan sa pamahalaan na kailangan ng saba­yang tugon at hindi pira-pirasong solusyon. Ayusin ang mass transport, maglatag ng malinaw na water contingency plan, at magbigay ng agarang ayuda sa mga pinakaapektado ng taas-presyo.

Sa mga mamamayan, panahon na ng pakikiisa. Magtulungan sa komunidad upang makatawid sa krisis.

Ang trapik, tubig, at presyo ay tatlong halimaw na sabay-sabay na humahabol sa bayan. Kung hindi kikilos nang mabilis at komprehensibo ang pamahalaan, ang mga Pilipino ang tuluyang masasakal. Panahon na para pasanin ng pamahalaan ang tunay na solusyon. Huwag naman palaging mamamayan ang magtitiis.